經濟客艙：阿爺條數好識計
■一旦美國真係提高中國關稅，香港轉口貿易角色好關鍵。 資料圖片
今屆特首選戰，大家都抱住緊張嘅心情，留意阿爺幾時開綠燈。結果梁振英臨門撻Q，上星期五宣佈不連任。對於阿爺開紅燈，梁先生要怪罪嘅，就入呢一男子數喇。
呢位一男子係邊位？要講講
古仔。習大大為首嘅權力核心，上個月見完梁特首，強調確保一國兩制不走樣。如果呢句說話以為習大大「又咁例牌講呢啲」，可能忽略咗阿爺對香港未來幾年點樣計。梁振英任內橫行無忌，由強行推國教、雨傘革命到濫用司法程序DQ議員，將香港推向大撕時代。咁啱多個主要國家遇上選舉年，英國脫歐、美國總統大選到意大利修憲公投，令民粹同經濟保護主義抬起頭。
特朗普當選總統後，阿爺就知道今鋪唔易玩。特朗普近日又再重提人民幣操縱匯率同提高中國關稅外，睇睇國務卿同商務部正副人選名單，包括保守派博爾頓及鋼鐵業富豪羅斯，位位都係中國貿易戰打手。換言之，特朗普上任後四年任期內，中國面臨風險唔細。阿爺呢個時候更需要搵一位信得過嘅人，保護中國面向國際市場嘅窗口，亦即係我哋香港。唔怕萬一，只怕貿易戰開打，香港成為阿爺要出嘅牌，可以用世貿成員身份緩和衝突。美國真係提高中國關稅，香港轉口貿易角色亦好關鍵，起碼國貨有渠道入到美國先。阿爺今次向梁先生舉紅旗，真係眼仔細細好識計。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com