2017會是股災之年嗎？
2017年01月03日
我自己很不喜歡這種誇張標題，因為怕嚇到人唔敢買股，而我深信巴菲特那一套，買大股長揸，好過放錢在銀行。所以事先聲明，希望唔好因為睇完呢篇文，令你哋不敢買股。
但7字之年好邪，1987年是我長大後見到第一個股災年，當年10月美國因為
電腦程式沽盤，出現大跌市，港股因而停市四日，而提出停市建議的是聯交所主席李福兆，在半夜三點打電話畀當時的財政司翟克誠，翟克誠未瞓醒就同意咗，最後政府追究責任，開「快勞」查李福兆，結果李福兆坐監收場，呢一役印象好深。
10年後到1997年，那一年回歸一片昇平，5月泰國出事，香港仲借錢畀泰國填氹，董伯伯7月上任做特首，9月仲好有信心推8萬5政策，大增房屋供應打擊樓價，到10月就因亞洲金融風暴爆股災樓災。恒指由高位17000點，跌到1998年低位5800點，到政府夾硬入市先至止到血。
平買收息 衰咗長揸
再過10年去到2007年，呢一年嚴陣以待，當年10月好怕重演對上兩個10年的10月股災故事，點知無事，仲因為內地話開「港股直通車」炒上高位。呢次股災來遲了半年，到2008年5、6月就爆大鑊，美國出現次按危機、雷曼爆煲，美國最大的保險公司AIG都差不多玩完。呢個遲咗半年的股災，亦係大災。
好啦，又到7字，到2017，今年會唔會爆災呢？ 由於1987、1997、2008年股災的出現時間睇唔到乜嘢科學聯繫，所以亦都講唔到2017年會唔會爆災。夾硬要搵啲聯繫，反而1997年的情況和O依家有少少似，第一係美元走強，亞洲開始走資，借美元的公司開始有債務危機。第二係樓價高企，你睇O依家車位200萬一個都話幾抵，就知在長期低息環境下，資金無路可走，樓價炒到幾貴。(唔好睇完去沽自住樓，否則沽完樓價再升唔好搵我)。
美股續升 內地要捱
今年有無股災無結論，但我自己會以「戒慎恐懼」之心去買股，預咗萬一有股災唔好搞死自己。策略係主要買大股，而且唔平唔買，即使強股太近高位亦唔吼，最好買派息有5厘以上者，衰咗可以守，但升得10幾20%就會走，因為正路睇港股最叻都只是上落市。
就2017年開局而言，似乎仍是美股續升，內地要捱之局。就美股而言，美之行高盛發佈了2017年的美股預測，預計特朗普一系列政策將主導2017年美股，估計會衝高回落。
高盛估計市場對特朗普的樂觀的情緒，將持續到2017年第一季，令標普500指數由目前的2202點，衝向2400點(再升9%)。而樂觀情緒預計將在下半年消退，標普500將回落至2300點，仍比現在高5%。我自己對美股無高盛睇得咁高，但認為會強過港股。
今年內地匯價和經濟仍捱打之局，對港股有約束。阿爺好怕過年後資金外流人仔大跌，在過年前出招監管內地人換匯出境，2017年內地人5萬美元購匯額度並未縮減，但要經更複雜的購匯流程，以及更嚴限購匯不得用於境外買樓、證券投資、購買人壽保險和投資性工具。
另外內地也開始調控對今年經濟增長預測，繼早前外電引述消息指，國家主席習近平已放棄經濟增長6.5%的底線後，人民銀行顧問、央行貨幣政策委員會成員黃益平表示，中國應設更靈活的GDP增長目標，2017年目標應為6至7%(2016年GDP目標6.5至7%)。可以預計今年內地經濟增長會更慢。另外，中國去年12月官方製造業PMI為51.4，較11月略為回落0.3個百分點，並低於市場預測中位數的51.5，雖然仍為去年內第二高，但經濟反彈動力正在減弱中。今年年頭市場仍要消化人仔腳軟和內地增長放緩的壞消息，捱過之後，料有一波反彈。
陸羽仁
金融High Tea 舊文
來源 source: http://hdfin.stheadline.com