笑到最後：
情人節未訂枱點算
■如果今個情人節未訂枱，綜合身邊美女意見，仲有三個可接受嘅方案。 資料圖片
2015年11月本欄曾介紹過一隻美股Activision Blizzard，有打機嘅朋友應該知係Diablo同Warcraft等遊戲嘅生產商，上周五升18.88%報47.23美元
。以本欄推介時35美元計，推介至今升35%。
當年推介原因係Warcraft出電影，覺得會變成另一個「迪士尼模式」，第四季業績顯示，每股盈利升57.1%，更重要係遊戲活躍用戶增至4.47億名，用家去年花430億小時在Activision Blizzard的遊戲，接近Netflix的450億小時。據業績所講，主要收入來源都係來自遊戲。
反而2016年電影推出前，股價回落至28美元，之後先慢慢回穩。如果當日大跌冇選擇撲暈自己，而係選擇「我恐懼」沽出，咁就錯失隨後升幅。現時「電子競技」成為體育項目，打機變成職業，遊戲開發商變成賣工具，Activision Blizzard亦都有電競聯賽去打，趨勢只會係更多小朋友做職業打機手。不過股價震盪，好似舊年年尾都試過由44美元跌返落35美元，打回原型嘅程度令人懷疑自己係咪睇錯，都係買咗之後唔理佢比較好。
本欄見報日嘅翌日係情人節，如果未訂枱點自救？綜合身邊多名未婚美女意見，可接受嘅方案至少有三個：
一、食非西餐。因為如果唔係最貴嘅西餐，情人節一定人多同限時，塊牛扒食得辛苦，反而扒冷去食中日泰菜，輕輕鬆鬆又過一關，好多港女，其實好錫男友荷包。
二、自己煮。非正式統計最冧，但前提係要有樓，完。
三、如果冇樓，其實都冇所謂，因為現今社會風氣崇尚簡樸文青，一塊枱布、兩支蠟燭，喺沙灘或露營地點野餐仲浪漫，記住，事先要預習點去，黑媽媽盪失路就唔好。預祝大家愛情股運兩得意。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com