【不問價追】辦年貨（小炒王梁心欣）（第110期）
2017-2-5 14:00:36
假期前夕，大市表現不過不失，但個別股份炒得熱烘烘，簡直係「個股樂園」。板塊日日輪流轉，資源股、內險股、證券股、汽車股，下下都有資金衝入，足以證明假期前「聰明錢」的部署。隨著美國總統特朗普上
場，美金回返些少，資金流入新興市場，港股理應受惠。細心啲睇，內地在1月下旬，每逢尾市都有無形之手托高，維穩咪濃，就睇到新年假期有紅盤高開之意，2月睇好機會頗高。
過年前後，港股通停足一周，意味著北水停一停。你可能會話，唓，北水一早冇流落來啦，連佢哋成滬深兩地成交都一度唔過3000億人民幣，又點會有錢入來港股呀，簡直妙想天開。咁你就錯啦，其實假期前已經見到啲北水每日都浸住有10幾億錢落來，你知啦，北水資金幾咁暴力、幾咁強大，一下沖埋嚟港股又有幾奇。其中落後好多的中資股特別吸引眼球，但千祈唔好揀同人民幣貶值大大有關連嘅航空股同內房股。中資保險股敏感度高值得一博、資源股更加係落後，江西銅（00358.HK）、中國太平（00966.HK）、水泥股都係小炒王杯茶。如最值得收到倉的，要推洛鉬（03993.HK），發A股後買剛果銅鈷礦相信大有作為！記得留返貨底。
踏入雞年，再提提大家投資心理素質。由於有了自己平台alphabull.tv，小炒王同好多戰友都多咗時間分享心得。有一點特別想提下新手嘅投資者，買入股份之後，千祈唔好有「即買即中獎」的心理，即買即升咁簡單，就唔會人人都營營役役走去返工。買入股分後捱一捱係好正常，最緊要係你了解過隻股份，對佢有信心先至會揸。日日為幾仙幾毫憂心萬心，相信你都好易頂唔順，所以最緊要都係你自己有做過功課。話雖老土，但畢竟畢生受用。
祝各位雞年，「少勞多得」「賺到盆滿砵滿」恭喜恭喜。
不問價追 - 小炒王梁心欣 舊文
來源 source: http://www.winmoney.hk