異動空間：蓄勢再大炒板塊
■老特擬廢除前朝推行的金融業改革法案，舞起銀行股。 資料圖片
美國經濟數據一大堆，參差、矛盾在所難免，市場睇重邊一面，正是趨勢所在。上周五美國非農新增職位遠勝預期，正路解讀係經濟勁，3月加息機會增，但市場反應剛好相反，美滙急回、金價漲，資源價格反彈，搞邊科？原
來大戶睇緊工資增長只有0.1%，令人失望。有分析員的睇法是這樣：以失業率（4.8%）睇，美國已近全民就業，非農增幅理應放慢，工薪會升得較急，但剛公佈的數據則相反，即與全民就業仍有距離啦！
這樣解讀明顯是倒果為因，睇住市場反應再諗藉口，但股市從來都是先有結果，再找理由。大戶在押注3月不加息，真金白銀賭黃金、資源價格向上，加上老特擬廢除前朝推行的金融業改革法案，舞起銀行股，有利美股再上衝。美元弱利新興市場，港股上周調整過後，配合北水重臨，本周有條件再衝過。
2008年金融海嘯曝露出金融業冇王管所產生的亂象，奧巴馬補鑊推出Dodd-Frank Act，加強監管金融機構經營模式，但特朗普當治國為一盤生意，當然唔鍾意樣樣管住曬，鬆綁事在必行。人性貪婪，唔管自然又亂番，但銀行賺錢容易了，對經濟有支持，如今高盛同學會重返白宮，金融股時來運到！
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com