笑到最後：上流機會漸消失
■Uber五司機早前罪成。 資料圖片
兩單看似無關嘅新聞：樓價再創新高、Uber司機罪成，反映香港前景難樂觀，過去十年樓價長升，冇得將當中嘅好處套現，反而壞處陸續浮現。
過去十年全世界發展快，主要集中向科技業，Google、facebook成功將「產業轉型」
，將用戶變成產品，打包數據發售；摸得到嘅要數電動車Tesla，創辦人Elon Musk更加將業務推上太空，預計2025年客戶可以用20萬美元移民火星。
香港過去十年最偉大嘅發展，就係樓價成為全球第一。樓價長升唔係一面倒壞事，本來可令持有物業嘅人向上流。香港曾經好多人買一間樓，升咗拆兩間，之後二拆四致富，多重辣招令呢種投資方法成絕響，租金收入3厘計算，要5年先回到15%劃一印花稅。樓市升到上火星，有幾多人夠膽沽自住樓試嚇套利？樓市已失去向上流功能。
地價貴壞處係令創新科技難以孕育。Startup創頭公司用字精妙，其中一個環節叫Incubator，直譯係孵化器，意思係為startup提供商業或法律服務及提供場地。叫得做孵化，就要時間培育，startup現金流傾向長時間係負數，直至搵到盈利模式先爆升，租金貴就好難捱，香港食曬地價貴嘅壞處，所以喺香港賣魚旦易過創科，因為「即食」。
本土冇土壤創科，引入外資唔係壞事，就好似香港冇本土嘅國際級投行，任由外資嚟開業，請人都叫推動就業。最起碼做個Uber司機，一個月搵多一兩萬蚊，都叫現兜兜。偏偏港府對科技發展最重大嘅貢獻就係控告Uber司機，並且最近裁定罪成。現行法例之下控告Uber司機有罪無可厚非，但政府完全冇諗過修例彌補不足，對策就係禁咗佢。
樓價貴唔一定係困局，善用高樓價好處，如維持自由買賣，變成外資儲存財富嘅工具，容許有眼光嘅本地物業投資者創富，都叫做一條白手興家嘅出路。辣招令到只有發展商先有權賣樓賺錢，一般人已經冇「退而求其次創業」，退而求其三幫外資科網企業打工，博上市有得分股權發個小財，𠵱家都面臨被政府趕絕。
香港本來機會處處，只係政府努力將向上流嘅機會逐一撲滅。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com