中環在線：Kim Robinson門徒
半價吸新客
■Kr+門面嘅宣傳好搶眼，8點後新客戶有半價優惠。
「殿堂級髮型師」Kim Robinson，出名淨係剪名人，好似林青霞、林憶蓮同埋已故嘅梅艷芳個頭都係出自佢手筆，最低消費仲要成一萬蚊港紙，但始終唔係人人畀得起，所以由Kim徒弟仔主
理嘅「kr+」，就專攻後生仔市場。𠵱間「kr+」2015年底喺西環同銅鑼灣開業，西環店今年3月摺埋咗，搬埋去銅鑼灣一齊做，唔知係咪生意難做，近排仲推埋半價優惠吸客㖭。
洗剪吹450蚊
查實kr+雖然叫做打平民路線，但都不乏「星級捧場客」，好似謝婷婷、大台主播陳珍妮，仲有一班instagram女神咁。華華前幾日打去銅鑼灣分店問過，星期六繁忙時段3點鐘做洗剪吹都未full，至於大家最關心嘅價錢，一般都分為兩種，分別係「髮型師」同「高級髮型師」，洗剪吹分別係450蚊同600蚊，查實都唔平㗎。
據了解，為左吸客Kr+近排就推出8點後新客戶有半價優惠，仲延長咗營業時間去到夜晚10點。去到咁盡，唔通生意真係咁難做？不過又咁講，今次唔係佢第一次推優惠，之前都推過指定特價時段有七折嘅。
話分兩頭，人人都想一早起身，或者晏晝時段去set番個靚頭，夜晚出去見人，如果真係成8點後先去set頭，出到嚟個天都黑曬，個優惠係咪有啲無謂？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com