Money Walker：AI搶飯碗哀歌
■AI可瞬間處理海量數據。 資料圖片
機械人搶飯碗搶到去金融業，貝萊德將部份基金由人手改為AI（人工智能）操盤，有基金經理因而被裁員。
近年醫生同律師呢類需要相當專業知識嘅行業，部份涉及數據及資料處理嘅工作已可交託予AI進行，
所以AI被廣泛應用於需處理大量數據嘅金融業，不過係時間問題。不過筆者認為，就算AI操盤將來變成普遍現象，人類喺金融界嘅生存空間亦唔會完全被抹殺，只不過未來嘅金融從業員需要具備更高水平嘅知識同技能，先可以於行內立足。
AI有本事用瞬間處理海量數據，對市場異動嘅反應亦固然即時到無人能及，但總有啲能力係人類擁有而機械人欠奉。首先，金融世界古惑嘢極多，即使AI有本事讀懂背後操作，亦未必好似真正嘅操盤手咁，曉得從各方收料並判斷真偽，再利用有關消息圖利。其次，有睇過電影《華爾街綁架直擊》都知道，電腦操盤存在被有心人操控嘅漏洞，基金公司要堵塞漏洞就要依靠多重措施，當中肯定需要應用到人類智慧而非人工智慧。
AI無法完全取代人類，但無可否認AI廣泛應用將導致唔少人失業。每個世代嘅人於職場上都會面對一輪又一輪嘅時代淘汰，上一代人就經歷過製造業式微同服務業抬頭，但多數人一個行業仍可做足大半世，去到今時今日，已經發展到人人都要一身有幾項技能先能夠喺職場生存。而隨住AI普及，下一世代面對嘅就業挑戰更難想像。筆者不排除AI爭飯碗假以時日有可能觸發反科技情緒，一如刻下嘅反全球化浪潮。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com