魚樂無窮：買股票要等運到
■炒股贏錢最重要因素係耐性。 資料圖片
炒股贏錢最重要因素係乜？呢一刻你問我嘅話，我嘅答案一定係耐性！無他，最新持倉主要係三類股份，分別係強勢藍籌、中小型績優股及全購股，全部都屬於等運到系列。
強勢藍籌需要嘅耐性最少，因為只要揸緊信念，等佢哋自己輪流升即可，
如果你有騰訊（700）、滙豐（005）、長和（001）等，你就會明我講乜。唔怕佢哋唔識升，最怕早走咗買唔番。
中小型績優股，需要嘅耐性較多，因為每年業績通常只得兩次，即每6個月才能review心水股的成績表，其餘時間真係坐定定等運到。當然，買績優股好處係每次放榜後，市場便會有re-rate力量出現，令股價水漲船高，甚至炒定下次業績嘅憧憬；所以幾時都話，業績期往往係價值投資者嘅尋寶潮。
玩全購股最辛苦，需要有超人的耐性，因為你永遠唔知道幕後人士幾時做嘢，隨時可以悶你一年半載。有豐厚回報當然好，但要約期後打穿全購價喪輸例子亦比比皆是，輸錢輸時間，有苦自己知。股票市場一年運作250日，要贏錢唔係日日炒出炒入，而係學習等運到。
唐牛
http://www.fb.com/tongcow88
本欄逢周二、四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
唐牛
魚樂無窮 - 唐牛 舊文
來源 source: http://hk.apple.nextmedia.com