恒大勁chok上
2017年05月25日
港股想跌唔跌嘅狀況維持，帶動大市嘅火車頭騰訊(700) 進入阻力區，不過大市仍然有風頭躉，內房巨股恒大(3333) 昨日急升17%，市值單日爆升近200億元，估計原因係同佢今年分拆A上股的計劃有關。
恒大早前決定借殼在深圳上市的深深房
(000029)回歸A股，計劃係今個月披露資產重組預方案或報告書，計起時間應該差唔多。因為咁，恒大今季表現強勁，但過程勁chok。上個月，恒大股價由近9月高位急插落嚟8元水平，港交所紀錄顯示有空軍沽空，但公司隨即啟動回購，令股份穩定之餘反挾向上，當時出動銀彈粗粗哋估計有5、60億元，可以估計市場貨源收乾咗唔少，而家借住市場嘅憧憬好易一挾而上。
內房股紛創今年新高
恒大回歸A股，曾經引入咗八大投資者注資300億元人民幣。當時分拆出嚟嘅地產公司估值本為1980億元，注資後估值為2280億元。當時市場分析，認為估值在A股地產股中算是高水平，入股財團願意俾呢個價，認可這種估值提升，一方面是基於過去多年恒大業績增長的穩定性和高水平兌現，另一方面也是出於對恒大未來繼續保持高增長、為投資者創造更大價值的充足信心。
係注資協議中恒大承諾咗，地產業務未來三年(2017–2019年)預期合約銷售額分別約為4500億元、5000億元、5500億元，預期營業收入分別約為2800億元、3480億元、3800億元，預期扣非凈利潤分別約為243億元、308億元、337億元。有熟悉恒大人士話，唔講未來兩年，如果講今年條數，呢個數字比公司內部目標低咗啲，算係保守咗。過去恒大賣樓薄利多銷，未來三年要做嘅，就係點樣提高利潤率。
據了解，上市七年來，恒大的銷售金額年均複合增長率高達43.6%，而完成未來的業績承諾僅需16.5%的平均增長率。凈利潤方面，過去恒大的平均核心凈利潤超過10%，未來三年只要能實現8.8%的核心利潤率，利潤額就可達到243億元、308億元和337億元。
恒大突然爆上，估計與回A股有關，若然佢掛牌爆上，咁對控股嘅香港恒大有利，加上早上回購減少咗貨源，令到升跌特別犀利。昨日佢一輪急升，市值去到1522億元，比起一年低位差唔多升咗900億元 ！升到呢啲位都好難追啦。
恒大(3333) 連升8個交易日創新高，昨日收報11.66元，其他內房股都受惠，龍湖(960) 曾高見14.92元，創一年新高，收升9%報14.82元；另一隻創新高係雅居樂(3383) 曾見7.16元，收升8%報7.1元；佳兆業(1638) 漲7.6%報2.41元；融創中國(1918) 升6.8%報12.06元；碧桂園(2007) 升3.1%報8.25元，總之買中內房好易就有錢執。
一眾藍籌小升撐大市
大市呢排唔肯跌，就係靠唔同板塊輪流頂住。呢排做火車頭嘅騰訊一度跌穿270元，低見269元，收跌0.58%報273.6元，但科網股個別發展，天鴿互動(1980) 升7.56%報6.69元；雲遊(484) 升1.79%報9.08元；博雅(434) 升1.07%報3.78元；網龍(777) 升0.73%報20.65元；美圖(1357) 無升跌報8.99元；IGG(799) 跌1.8%報10.92元。
藍籌股友邦(1299) 升0.37%報55元；恒生(011) 升1.05%報163.1元；國泰(293) 重上12元，收升6.1%，報12.18元，為表現最佳藍籌股。係幾隻升小小下，恒指收報25428，升咗25點；國企指數收報10390，跌4點，成交金額700億元。
陸羽仁
金融High Tea 舊文
來源 source: http://hdfin.stheadline.com