電力股好炒過比特幣
2017年05月17日
勒索程式WannaCry全球爆發，搞到黑客高手俄羅斯都倒瀉蘿蟹，新進展係話黑客已偷了迪士尼公司的一套電影。並勒索贖金，係全球一片網絡恐慌下，PureFunds ISE網絡安全股票基金(Cyber Security ETF) 昨日彈高3%，
係今年以來最大的單日升幅。香港上市公司和防毒最相關的金山軟件(3888) ，昨日升上22.1元近一年高位，不過要提提大家，係單靠防毒概念，恐慌過後可能會打回原形。
大唐猛炒去產能
勒索程式益到防毒公司做生意之外，由於佢要求受害者用比特幣俾贖金，令到呢種虛擬貨幣再受注目。比特幣幣值今年已經攀升唔少，有人懷疑佢有啲起泡，而家再沾上呢啲消息，雖然令佢大出風頭，同時亦令人關注它的透明度唔足，同埋好容易藏污納垢，成為黑錢溫牀，若然各國聯手制裁，就會對佢形成好大嘅政治風險。
中環茶友中，有人都好有興趣研究比特幣，係去年內地電價低迷時，佢仲諗過係咪去內地搵啲平電地區搞個中心開發比特幣O添。
比特幣作為全球最流行嘅虛擬貨幣，買家有兩個方法以獲得，一個是在市場買入； 另一個則是用電腦自行「開礦」，由於開礦要用電腦運算力，涉及消耗大量電力，所以開礦有無着數要睇兩樣嘢，比特幣價同電價，就好似掘金要睇金價同開礦成本。去年內地電能供應過剩，電力股都跌到七個一皮，比特幣就相信因為走資需求向好，形成有利嘅開礦條件，茶友就係當時研究係咪可以去開礦，後來佢發現呢個方法應該可行，而且內地大戶做緊，傳聞七成比特幣在內地開發。
不過，而家情況就唔同左，因為內地去年起推動習大大所講的供給側改革，即係去產能，電力都係其中一環，好似大唐(991) 呢排正係炒去產能，股價連日飆升，昨日再升左8%去到2.88元。
茶友話，如果中央真係去產能令電價回升，咁係大陸搵平電開礦賺錢機會就大減，而最近WannaCry勒索案肯定激怒左全球各國同美資幾間巨企，佢地除左追殺始作俑者，會唔會都怪罪埋比特幣呢個收錢機制呢？比特幣嘅誕生本來已經欠缺透明度，引起過好多揣測，包括話係美國情報組織搞嚟衝擊全球金融體系，令美元可以獨大的陰謀論。
比特幣無息收，買賣佢本身就係投機行為，投機行為從來都係最好低位進行，而家佢熱到有點燙手，風險咁大就唔係咁諗得過啦，因為只從值博率角度，買佢不如跟炒電力股可能仲好啲啲。
睇番呢排當炒嘅電力股，有啲有派息盈利，好似炒得最熱嘅大唐，股價由一年低位1.9元爆上，迄今累積升左五成以上。
受到產能過剩影響，上個年底佢無錢賺兼無息派，不過佢3年高位係4.9元，資產就有3.35元，大行瑞信話，中央去產能益到佢，如果信大行嘅講法，咁炒佢至少好過信炒到高位的虛擬貨幣。
滙控罕見十連升
中國政府考慮將火電及核電企業重組合併的傳言，唔止益左大唐，其他電力股好似華潤電力(836) 都升3.5%，報15.42元，報2.88元；華電國際(1071) 升5.7%，報3.7元；華能國電(902) 升2.4%，報5.92元。
恒指收報25335，跌左35點；國企指數收報10433，下滑16點，成交780億元。滙控(005) 連升10個交易日，咁嘅走勢近年都算少見，佢一度高見69.15元，收報69元，升0.22%，周三公佈季度業績的騰訊(700) 先升後跌，一度高見261.6元，收報258.8元，跌0.08%。挾住大股向上，很有殺淡友的味道。
恒基做清兵勇奪地王
最後講兩句美利道地王開標，呢次雖然中資無出重手，結果由恒基贏得，但地價都去到5萬元一呎。恒基係國金中心大業主，可能因為咁佢出到咁勇嘅價。
陸羽仁
金融High Tea 舊文
來源 source: http://hdfin.stheadline.com