操盤手劄記：效法黃蓉低吸郭靖
■以《射鵰》套入股市，主角郭靖業務簡單，背景強勁，是潛力股。 互聯網圖片
論武功，俗世中不知邊個高！喺股市搵食，有時亦唔知邊隻係老實股，邊隻係老千股！中金同David Webb嘅黑名單，只係聊備一格。如果《射鵰英雄傳》嘅郭靖、楊康上市，你會揀邊隻？
先
講郭靖，大股東係江南七怪，保薦人兼包銷商係黃蓉，引入「天下五絕」基金中嘅洪七公、周伯通參股，專注提升技術、改善業績。至於楊康，控股股東係完顏洪烈，注入大金資產重組後易名完顏康，後因大宋本土股估值較高而回歸，改回楊康上市，既有大莊丘處機入股，又有細莊梅超風入飛，仲有最牛女散戶穆念慈頂頭槌落飛。
唔使諗，揀郭靖！「股神」畢菲特話齋：「永遠不要投資你看不懂的企業。」郭靖業務簡單，楊康則睇唔透，關連交易媲美瑞聲（2018），隨時會俾沽空機構狙擊；而且成日改名係老千股特徵之一，概念多又點，只啱短炒，唔啱長揸！雲雲港股中，又有冇郭靖咁嘅潛力股？我近排留意緊天溢森美（756），畢菲特愛股可口可樂都係佢老主顧！
天溢係中國橙汁商，主要產銷自家品牌森美純鮮橙汁、售賣鮮橙，以及為可口可樂等飲品商供應濃縮橙汁。近排喺惠康同波仔促銷，賣到斷市；早幾日又宣佈全國推出橙汁智能販賣機，並同央視簽約拍攝專輯。不過，連串動作未見拉升股價，皆因舉頭三尺有陰霾！
話說三年前，公司以1.12元批咗一億股畀鄧普頓基金，主席辛克當時承諾，三年後個人願意以1.7元買返。呢場對賭，今年三月尾到期，但至今仍未善後。天溢現價1.16元，市場擔心鄧普頓會喺市場沽貨，再索回差價。若果件事妥善解決，天溢應該會展開新一輪升浪。
天溢係成長中嘅公司，現價較資產淨值仍有兩成折讓，就好似初到張家口嘅郭靖咁，黃蓉識貨，趁低吸納。事實上，辛老闆過去兩個月亦三度增持天溢，四月嗰次平均價1.05元，五月兩次平均價都係1.17元，以真金白銀顯示對公司有信心。
割柑人
本欄逢周四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
割柑人
操盤手札記 - 割柑人 舊文
來源 source: http://hk.apple.nextmedia.com