財金冒險號：
多謝沽空機構
■索羅斯廿年前狙擊港股港元，被罵作「大鱷」。 資料圖片
沽空機構造成滿城風雨，業界有人痛罵葛咸城之流，主張加強監管沽空機構，以免法規只管好人、不管壞人。此「好/壞」之分幾好笑，預設了唱好、買上嘅係好人，唱淡、沽空嘅係壞人，同大陸嘅「惡意沽空」論如出一轍。
借定貨沽空，然後出報告唱淡，如非證監會持牌人，絕無違法，正如任何非持牌人都可以喺報紙、網上唱好自己嘅持股，除非故意發放虛假訊息誤導公眾，而證監會本已有監管，對Citron Research唱淡恒大（3333）而裁定市場失當，就係例證，根本毋須再加強監管。
業界抨擊沽空機構，彷彿沽空就係原罪，廿年前索羅斯狙擊港股港元，就被罵作「大鱷」。但批評者無視沽空者嘅作用，第一係「價格發現」（price discovery），令價格趨向理性，第二係捉妖。
港交所（388）總裁李小加講過，監管者無法事前過濾老千股，投資者唔好掂就得。渾水之類正好幫手捉老千。沽空機構絕非英雄，無非圖利，但散戶應該感謝佢哋，令潛在老千唔敢咁猖狂，亦令投資者得知老千常用技倆，減低踩地雷風險。
紙包唔住火，老千股始終會爆煲，只係沽空機構令佢哋盡早現形。沽空機構亦唔係攪屎棍，只係指出問題所在。不過現今香港有問題時，唔係設法解決，而係鬧指出問題嘅人「搞亂香港」，所以沽空機構被鬧，可算意料中事。
笑笑生
http://fb.com/sneeringman
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
笑笑生
財金冒險號 - 笑笑生 舊文
來源 source: http://hk.apple.nextmedia.com