升市長短棍
2017年06月09日
英國國會大選，執政保守黨有啲跣腳，首相文翠珊諗住對手工黨咁弱，提前大選希望取得大勝，等自己可以有更多籌碼去同歐洲談判，點知佢嘅政綱太過心雄，提出多項削減開支建議，最攞命係減左老人家福利，加上被人不斷發動恐襲，令保守黨支持率急跌，如果今次年輕人唔出嚟投
票，咁就隨時「大鑊鳥」。
買個股唔易跑贏盈富
正路嚟講，保守黨呢次應該都仲保得住執政地位，出現好似脫歐嘅黑天鵝機會仲係細啲，但能否贏得過半數就好難講，唔夠半數就要組聯合政府，轉為弱勢。文翠珊想做新鐵娘子，而家睇嚟夢想都好大機會提早幻滅。
在文翠珊提出大選時，大家都對佢充滿憧憬，鎊價彈上高位，但隨著保守黨選情滑落，英鎊匯價開始乏力，所以呢次選舉，除非保守黨可以贏得好漂亮，否則對當地股匯都難有好消息。
上次英國脫歐，恒指大插成千點，插完呢一吓就見左底，就算後來美國總統特朗普爆冷勝出，港股都無平貨執。呢排恒指升上高位，由於係唔同板塊輪流炒，好似周初炒完地產、內房，昨日又炒吓濠賭股，散戶左撲右撲都幾奔波。
有中環茶友係去年趁英國脫歐買入盈富基金，而家已經執左三成，佢笑言，買股要賺到三成唔係咁易，皆因今次指數爆上，其中火車頭係騰訊(700) 。騰訊股價貴，而且又大價，唔係咁多散戶有能力或興趣買，如果無買騰訊，咁就已經蝕左好多章，如果笨笨地買盈富基金，咁騰訊升佢都攀到車邊。
不過，買指數基金郁得慢，好多人嫌佢沉悶，鍾意炒吓板塊，茶友都興玩吓長短棍，買啲指數基金之餘，都搵啲落後板塊短炒吓。最近佢就研究吓紙業股，因為佢識得朋友係做紙，知道內地紙業去產能已經有一定成效，估計未來紙業股業績會唔錯。
睇番呢個星期隻森信紙業(731) 發盈喜，預計截至3月止財政年度公司股權持有人應佔溢利較2016年之增幅不低於70%，主要由於集團紙品業務之收益於下半年度的可觀增長及零售業務之虧損減少所致。
森信炒紙業去產能
係紙業股中，森信唔係一線龍頭公司，盈利比較波動，容易受循環起落影響。通常二線公司嘅生意係好景時會升得特別勁，主要係龍頭公司生意比較穩定，反而二線公司係旺市多做生意，賺嘅錢就直入尾袋，內地減低紙業產能，好多龍頭公司嘅盈利去年已經回升，森信盈喜預告勁升70%後連升多日，昨日再升6.3%，報收0.51元，而家佢嘅市盈率只有13倍，市值只係6億元，加上過去都有穩定派息，都算係有一定質素嘅股仔，但若論紙業股，當然以玖紙(2689) 同晨鳴呢啲龍頭穩定，兩者昨日都分別升左4%，收報9.92元同9.56元。
港股面對超級星期四，同日歐洲央行將公佈議息結果、英國國會展開大選，以及美國前聯邦調查局局長科米將到國會作證等重要議題嘅超級星期四前，市場預期只會窄幅上落，恒指開市一度下跌50點，低見25923點半日低位，其後中國公佈進出口數據表現理想，帶動內地股市轉跌為升，恒指重上二萬六大關，創23個月高位。恒指收報26063，升88點；國企指數收報10649，漲38點；成交金額793。市傳吉利(175) 將推售的新產品獲經銷商追捧，股價升9.39%，報15.14元，成表現最佳藍籌，連帶其他汽車及零部件股造好，國泰航空(293) 進行第二輪節流，股價升逾6%，是升幅次高嘅藍籌股。
資金流入濠賭股，澳門勵駿(1680) 漲咗10%，報1.55元；澳博(880) 升5%，報8.02元；大股銀娛(027) 都升3.3%，報47.45元。
近期受到沽空報告影響的瑞聲科技(2018) 和達利食品(3799) ，股價都升近4%收市。
陸羽仁
金融High Tea 舊文
來源 source: http://hdfin.stheadline.com