經濟客艙：傾刁食早餐
■貝索斯靠網上書店起家，近年透過收購，開闢全新嘅收入來源。 資料圖片
男人有時候買嘢係唔講理由，而有錢男人買嘢更加唔需要理由。
做刁，好多時候重大嘅決定，係喺辦公室以外進行。大家約埋食餐飯，或者更容易了解今次交手嘅為人，又可以緩和氣氛。聽過一
個故事，有日B先生約咗賣方R先生食早餐傾刁。B先生點了一份豐富嘅早餐，有地中海墨魚配薯仔同煙肉外，仲有一隻poached egg，即係我哋叫開嘅溫泉蛋。大家東拉西扯一輪後，喺時候入戲肉。
R先生：「點解你有興趣收購我哋公司？」
B先生皺起眉頭，然後佢咁答：「你間公司，就係我呢份早餐嘅墨魚。就好似頭先我睇menu嘅時候，見到早餐有墨魚，我睇唔透喎，而且又未試過。所以，識食，一定食墨魚早餐。」
R先生聽完，幾乎想將佢飲緊嘅個杯咖啡噴出嚟。
最後，早餐食完，單刁等咗兩年，B先生撲鎚收購R先生間公司。
上述兩位字母先生，你知我知人人知，就係亞馬遜創辦人貝索斯，同美國網購商Woot嘅創辦人Matt Rutledge。7年前亞馬遜用1.1億美金現金全購Woot，呢個網站將美國嘅一仙拍賣發揚光大，每日喺網站放售一款特定嘅產品，以超筍價畀大家開價鬥搶。Woot唔會講定賣咩嘢，落單嘅時間又只限24小時，睇準曬大家鐘意執平貨嘅心態。最後唔只吸引大家用，連貝索斯都肯落疊。
貝索斯最近又買嘢，有冇同Whole Foods Market食早餐就未知，但今次亞馬遜就認真和味，股價又洗洗科網股頹氣。亞馬遜上星期五最升近4%，差兩個半毫美仙，就可以重返1000美元，單日市值有成900幾億美金進賬。由網上書店起家嘅亞馬遜，今日的我打倒昨日的我，將網購同實體超市雜貨店結合，將會開闢全新嘅收入來源。
原來有錢男人買嘢唔係唔需要有理由，一個字，賺到錢就夠。
Captain Cool
https://www.facebook.com/seeforcaptain/
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
Captain Cool
經濟客艙 - Captain Cool 舊文
來源 source: http://hk.apple.nextmedia.com