中環在線：呂志和乖仔家族礦場「碌」大
■呂志和同囝囝喺礦場流過唔少汗水。 易仰民攝
嘉華集團噚日將用嚟起家嘅安達臣道石礦場還番畀政府，作為首間取得採礦牌照嘅公司，經營咗半個世紀，可謂完成歷史任務。除咗主席呂志和對礦場不捨，佢個仔、副主席呂耀東對礦場亦有深厚感情，自爆自細喺礦場長大，
畢業之後做過礦工㖭！
呂耀東指，移交可算為礦場畫上圓滿句號，回憶自己9歲起黐住老竇嚟，曾經喺陷阱處處嘅礦場失足跌倒，幸無大礙，佢因此明白到地盤安全嘅重要性。
佢當年大學揀讀土木工程，部份亦因為家族歷史。畢業後，佢返石礦場工作，頭4年每星期返足7日工，每日12個鐘，朝7晚7，就算係第二代都要打辛苦工。地盤工作留下深刻嘅記憶，教曉佢commitment（承擔）同discipline（自律）。
嘉華立足香港商場嘅首個行業就係開探石礦，1964年以1.64億元投得安達臣道石礦場，成為本港首間取得採礦牌照嘅公司，經營逾50年。呂志和致辭時似乎對地皮不捨，憶述當年打拼，年中無休，僅年三十休息一日，翌日即與工友齊齊開工。
1997年嘉華建材同政府簽訂美化與平整合約，噚日舉行移交儀式，將地皮交還政府，發展有1萬個單位、可容納2.5萬人口嘅社區。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com