恒大夾到淡友無氣唞
2017年07月27日
恒指打破上浪高點後，升勢暫時仲唔肯停，市場睇緊好友會唔會夾到兩萬七樓上結算。大市板塊輪流炒，炒完國際金融股後，昨日輪到內銀股發力。
恒指周二係滙控(005) 單天保至尊下保住不失，昨日一度回調，但未到下午已開始回升，呢舖做火車頭嘅係隻
內銀股，當中建行(939) 升左1.4%，報6.52元；工行(1398) 升1.3%，報5.47元；中行(3988) 更升1.6%，報3.82元，三大行合共推升恒指62點升幅，佔左大市主要升幅。
好友力托內銀股
港股喺七月升多跌少，逼近兩萬七千點，雖然指數已經係兩年高位，有人講緊大時代再臨，但係成交仲係唔多，炒作氣氛相距好遠。而且好多大股股價仲同港股大時代差好遠，內銀係其中一個大落後板塊，以最大隻嘅工行為例，佢啱啱先創一年新高，而家講緊6.4倍市盈率，4.8厘息。
內地《金融時報》早一日發放訊息，提出貨幣政策不宜進一步收緊，呢個講法可以有兩層解讀，一層係內地增長開始有放緩跡象，故此提出係貨幣政策上要作出紓緩；另一層最直接係話內地嘅收緊政策已經做得差唔多，無需要再加力收緊。
內地貨幣政策鬆緊，既要考慮本身狀況，同時要同國際形勢互動。去年美元強勁，人民幣有貶值壓力，內地幣策唔可以太鬆。
美元今年下半年開始變左鬆弛熊，無乜力，人仔轉強，內地喺幣策上嘅空間大左，加上美國息口上調步伐可能比預期慢，內地自然唔需要再收緊貨幣政策。內銀盈利同大陸宏觀環境鬆緊關係密切，加上佢地估值基數低，大市要再上，炒佢地一轉就唔奇。
內銀股推動大市嘅影響大，但市場焦點反而係搞作多多嘅內房股。早前萬達搞大刁，今舖就輪到恒大(3333) 借盈喜炒上，單日急升18%再創新高，報20.9元。
好多人都話，恒大月前畀沽空機構唱淡發難，股價一直夾上，雖然早前喺15、6元唞過一輪，但無點樣回過頭，沽空淡友若然唔肯投降，而家再夾上就好傷。
恒大之前放風話今年要減債同降低融資費用，藉以推高盈利。呢次中期預報盈喜，估計增長會有2倍，除左正常炒上外，仲好有夾空軍嘅味道。
恒大爆上，好多內房股都造好，呢排多左人炒嘅眾安房產(672) 升左5.6%，報2.62元；同恒大爭做一哥嘅碧桂園(2007) 升3.8%，報9.86元；融創(1918) 升4.2%，報19.38元；雅居樂(3383) 升3.7%，報8.92元，至於正路嘅大股華潤置地(1109) 都升1.7%，報24.35元；中海外(688) 升1.8%，報26.05元。
喺內銀內房雙引擎推動下，港股可以單日完成調整。恒指高開最多升155點，高見27007，創逾兩年新高，其後一度倒跌65點，低見26786，之後一輪好淡爭持後再升過，恒指收報26941，升88點；國企指數收報10831，漲48點，成交863億元。
領展賣產無乜興奮
市場另一單消息，係領展(823) 公佈，已委聘滙豐、瑞銀及戴德梁行協助評估有關領展的策略性選項。有報道指，領展將標售逾20個商場，估計市值達150億至200億元，意向將全部物業售予單一買家，並鎖定目標買家為基金或內地財團。
地標商場如樂富廣場將會保留，未翻新的物業則大有機會納入放售名單中。領展話賣產，似乎係想套現進一步變身做發展商，但市場似乎對呢個消息唔係咁興奮，股價逆市下跌1%，報收61元。
陸羽仁
金融High Tea 舊文
來源 source: http://hdfin.stheadline.com