異動空間：貪波幅易失大浪
■自北水湧港後，港股玩法已全然不同。 資料圖片
上周末擔任季度投資講座的主持，與多位資深股評人及基金經理對談，獲益良多。雖然港股連升7個月，但席上眾人多睇好「慢牛」格局持續，皆因與2015年槓桿炒賣推動的「大時代」不同，今次升浪確是由企業盈利復蘇推動。加上北
水持續流入，有利行業估值大幅提升，推動股價拾級向上。
散戶愛炒波幅賺快錢，此乃人之常情，皆因2007年後，港股一直無法再創新高，十年大型上落市，要搵食短炒波幅是合理之舉。不過，今年慢牛一級級上，資金又「抱團」圍炒小部份股份，「見龍頭升追二三線」呢招今年瓜多過菜，追落後越追越窮；如捉到龍頭股又食一兩棍就走，往後多數變食塵，或要用更高價追回，得不償失。
魏力活生生例子就是吉利汽車（175），5月底以11蚊「高價」冒著性命危險衝入，幾日飛上14蚊，9RSI爆上90，一心諗住「見頂喇啩」，隨手掟出街，之後當然是尾燈都見唔到了。牛市莫估頂，強者越強，買貨後宜「死坐」，勿貪波幅而錯失大升浪，需要耐性、信念兼備，因為自北水湧港後，玩法已全然不同，誰能盡早接受、適應中資大戶的打法，就能成為今浪的大贏家。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com