笑到最後：衍生工具唔係咁炒
■喺大牛市，唔少投資者鍾意玩衍生工具。 資料圖片
上星期四，因為之前嗰晚捱夜，遲咗少少起身。一起身發現恒指原來跌緊200點，其中一隻自己有揸嘅建行牛證仲打埋靶㖭。當時心諗，個市要直上冇理由咁樣回發，所以一次過將所有衍生工具平倉，輸少當贏。
𠵱家冷靜返睇，其
實嗰陣時係心雄過咗龍，一來身邊同事個個都係大大注買窩輪，受氣氛影響到；二來七月一路睇淡，點知七月係升得最勁，令到自己無曬戒心，諗住陪個市一齊癲。
類似情況，身邊好多朋友都遇到，高明比較好彩，雖然當時對眼紅曬，但係都記得自己月初定嘅策略，就係「高槓桿，低注碼」，預咗一筆可以輸曬嘅錢嚟買。
至於錯嘅係乜？第一，衍生工具嘅價值係可以去到零，統計學一條簡單嘅公式：預期收入（expected return），就係將機會率加埋入去計算回報嘅方程式入邊，假設輸曬嘅機會係50%，以呢條公式來計，買嘅衍生工具一定要至少倍升先有值博率。今次錯在搭順風車時只係諗住贏得多過正股就算，基本上入場果一刻計機會率已經係唔值博。
第二，注碼更緊要，如果真係玩衍生工具，假設個倉大約係100萬元，真正嘅玩法，應該係拎5萬元去買衍生工具，然後博10倍回報賺50萬元走。而唔係倒返轉，你本身有100萬元買曬衍生工具，博50萬元。無錯，衍生工具係要以小博大，任何情況之下以大博小，都係用錯工具，不如買返正股好過。當然，被市場氣氛影響時，任何金科玉律都會唔記得。
星期四五，兩日跌超過800點，與其話北韓開戰令到市跌，不如話個個買曬好倉，終於有機會俾大戶一網成擒。7月嚴重超買都唔跌，就係等人落曬疊先調整，結果跌幾百點買衍生工具嘅人已經扯曬白旗，但如果買正股，基本上唔係太受影響。今次嘅教訓係：買衍生工具平時賺得好快，個市跌少少就收返曬。買衍生工具要贏錢，必須要喺高位識得走人，而多數升到高位，人只會更心雄。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com