強股弱股怎樣揀
2017年08月14日
港股上周出現黑色星期五，北韓局勢緊張，港股大瀉560點，收報26883點，不但失守27000點水平，亦跌穿20天平均線。成交大增至1400億元，係兩年以來最多，反映大量獲利回吐沽盤。
回顧上星期最後三日，恒指累跌971點，高位回落非常顯著。
大家不禁問，港股是否已經跌完，定係仲有調整？美股喺上周五已經跌定，杜指收市升14點，但大跌後反彈力較弱，令人擔心仲會再向下尋底。
美股反彈弱尋底局
港股上周五接近低位收市，如果今日收市沒有300點以上嘅反彈，恐怕反彈力度仲係比較弱，似係尋底格局。
股王騰訊(700) 上周五最低跌到310.2元，收市報310.6元，接近低位收市，急跌4.9%，單係騰訊已經拖低大市153點，佔大市跌幅26%。股份跌，自然要尋求解釋。市場人士指騰訊旗下微信涉嫌違反網絡安全法，被國家網信辦立案偵查，影響股價急跌。
我覺得騰訊由去年12月低位179.6元，升到上周嘅高位330元，喺八個月內升了85%，差唔多一條直線向上，期間冇出現較大回吐。股價升咗咁多，調整下都好正常。所以我懷疑騰訊調整會唔會咁快結束，呢一浪調整得深啲，反而會健康啲，往後再升時都會紮實啲。
股王騰訊 何去何從
周末同中環茶友傾計，大家都覺得美國同北韓只係口水戰，環球大市處於高位，近期只不過係借勢調整。大家更有興趣討論嘅係騰訊究竟仲可以升到咩水平？在座好多人都買過騰訊，但都喺不同階段沽咗，又或者進進出出，總而言之，比起死揸到依家，回報完全無得比。大家哭股喪之餘，就話「死者已矣，知來者之可追。」有人問依家係咪買騰訊嘅時機？大家提出咗一個問題，騰訊能否喺一年內再升一倍？即係由310元升到620元。
騰訊現價市盈率63.8倍，如果今年內再升一倍，以去年盈利計嘅歷史市盈率就升到127.6倍！當然，騰訊升咁多，盈利增長快同行業壟斷地位大有關係，大家不妨睇下騰訊上半年嘅業績。
騰訊上半年收入676億元人民幣，按年增加48%，溢利199億元，按年增加40%；季度盈利首次超過100億元至107億元，按年增加47%，好過市場預期。騰訊之所以去到63.8倍市盈率，係受到強勁業績驅動，市場對其未來充滿憧憬。
再度倍升 PE天價
大家可以計計數，如果現價再升一倍去到620元，歷史市盈率就升高至127倍，假設今年全年盈利增加40%，到明年公佈完業績，市盈率會拉低至91.1倍，呢個數字仍然非常驚人。即使維持現價310元，市盈率仍然高達45.5倍，仲係一個相當高嘅市盈率，結論係：騰訊雖好，但股價太貴。未來可升，但現價大升一倍就似爬山，有相當難度，既要睇本身業績有無超常表現，亦要睇美股是否續炒。
有「玩嘢」茶友話，現時買騰訊不如炒華多利(1139) ，呢隻股可以話係「衰到貼地」，俾聯交所要求停牌，並列入除牌第一階段。因為聯交所嘅決定，股價由0.56元插到上周五收市嘅0.177元，市值1.5億元。茶友話，呢隻股一係死，明年初徹底除牌，一係馬上搵人注資重組。如果重組成功，股價升一倍都係三億元，依家買個主板殼也要六、七億元，呢種茶渣價，有得博喎！」
我插口提醒佢，雖然道理係咁，但買華多利同去澳門賭大細差唔多，得就隨時賺一倍，但重組不成被除牌，股價變成零，期間隨時停牌走都走唔到，係超高風險嘅賭博行為，輸清風險唔低，高回報都正常。
中信大錳 扭虧為盈
另一位茶友提出，科技股係現時最熱炒股份，資源股過去幾年係最差股票。大家會想像科技股可以升十倍，但冇人會想像資源股可以升十倍，所以科技股概念好股價貴，資源股平，但一啲業績已經渡過谷底嘅資源股，反而係良好投資，呢啲股份起碼唔會好似華多利，衰起上嚟股價會變零，就算深度回落，都仲有啲渣剩下。他舉咗個例子中信大錳(1091) 。
錳是煉鋼其中一種原料，所以同鋼鐵業榮枯相關。早幾年中國經濟回落，商品勁插，鋼鐵價格大跌，錳價大受影響。所以中信大錳由盈轉虧，衰足四、五年。不過，中信大錳最近剛公佈上半年業績扭虧為盈，上半年營業額27.5億元，增長115.3%。營業利潤有1.46億元，扭轉去年上半年虧蝕1.6億元。但由於一家聯營公司配股，導致中信大錳出現非現金虧損6940萬元，減少集團盈利，上半年純利只有7000萬元。雖然係咁，但已經遠比去年同期虧蝕1.6億為佳，係典型扭虧為盈嘅狀況。
錳價向上 業績可期
中信大錳總結咗未來發展機會同風險，主要係中信大錳擁有33%權益嘅聯營公司獨山金孟建造50萬噸錳鐵合金廠，年底前會全面投產，將會成為中國南方鋼廠嘅錳鐵合金主要材料供應商。另外上半年從非洲加蓬礦山出口到中國及印度嘅錳已達到47萬噸，加蓬礦山重新投入，會為集團帶來邊際現金流入。未來嘅風險係中國經濟呈現「L型」增長，形勢仍然嚴峻。短期要看鋼鐵業及錳業供給側改革成果同經濟增長力度，集團估計錳市場仍然會受到比較大嘅挑戰。
如果睇中信大錳上半年業績有7000萬元盈利(扣除6940萬元嘅非現金虧損)，簡單估計如果下半年市場不惡化，亦唔再有非現金虧損，公司全年會有2.1億元盈利，以現價19億元市值計算，市盈率只有9.1倍。
內地錳價繼續向好，上星期連升四日，近半個月漲幅6%，主要係南方嘅大型錳廠減產甚至停產，供應減少令到錳價上漲。電解錳上周五每噸上升100元，報10600至10800元。市場人士估計環保整頓令貴州、重慶及湖北地區大多數錳廠暫時停產或者減產，加上旺季來臨，需求逐漸釋放，錳價將繼續回升。綜合呢啲因素，若錳價再上，中信大錳全年盈利可以高過2.1億元水平。
分段吸納 觀望半年
中信大錳股價喺公佈中期業績扭虧為盈之後，曾經大幅上升，由原來大約0.47元水平，急抽至一年高位0.69元。但由於升勢太急，又遇到跌市，股價急速回落，上周五大跌9.7%，收報0.56元。我覺得呢隻股短期內可能跟大市下探至0.5元支持位。
一隻轉虧為盈嘅股份，的確會有一定機會。中信大錳屬於弱股，要睇能否由弱股變回正常股，博佢業績開始轉勢。大家要注意嘅係，買呢類股份唔會咁易發達，但如果搵到靚位入市，可以爭取幾成回報。
中信大錳2010年11月上市，當時招股價為2.75元，以中國最大嘅錳生產商作為號召。當時估計2010年純利1.5億元，比今年更低，但估計到2011年會有4.3億元盈利，因此吸引好多投資者入市。
無論如何，中信大錳現價比較低殘，如果今年能夠達到兩億元以上盈利，估計市盈率9倍，算是比較有防守性嘅股份。未來嘅風險主要係中國經濟是否可以持續增長，以及大市走向，反而唔係公司嘅管理風險。買入坐半年，等明年三月公佈全年業績。
陸羽仁
金融High Tea 舊文
來源 source: http://hdfin.stheadline.com