經濟客艙：
要識問呢三個問題
■美朝對峙局勢，三幾日內令全球股市市值唔見咗萬五億美金。 資料圖片
面對北韓隨時發射核彈威脅，聽過長居南韓嘅朋友咁講，「北韓問題對於南韓嚟講，好似一個計時炸彈，你唔想亦唔知道幾時爆。不過，呢個問題又未至於影響大家嘅日常生活，但係大家都
希望最好唔好開火、用軍事方法解決問題啦。」
財金界普遍認為，美國同北韓呢場隔空口水戰，冇乜嘢可以預測及分析，當美國總統特朗普遇上北韓領袖金正恩，結果只係沒有最癲，只有更癲。相嗌唔好口，呈一時威風，也要付出代價。兩位狂人嘈嘈閉三幾日，全球股市市值由上星期二嘅紀錄高位79.5萬億美金，唔見咗成萬五億美金。
資金，絕不受呢種小學雞式拋浪頭，勢色不對就要縮。作為股海載浮載沉嘅散戶，的確未必實踐「股神」畢菲特嘅致勝操作：「別人恐懼時我貪婪」，趁跌市撈底。不過，如果有機會再遇上地緣政治風險嘅消息，唔想別人恐懼時我又恐懼，過份被情緒主導，可以跟一個著名基金投資團隊提供嘅錦囊，問問以下三個問題，包括第一、事件是否牽涉超級政權？第二、對國際油價構成風險？最後亦是最重要，會否對金融體系構成風險？美朝對峙局勢而言，回答上述三項問題時，暫時睇到第二同第三個問題皆屬「不是」。第一個問題就有少少難講，侵侵又想搵中國過橋，仲要睇多幾日侵侵點擺姿態。
FB page：https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.apple.nextmedia.com