財路：論估值呢隻抵到爆
■五菱對上兩年盈利好爆炸，現價與同類股比較，全場至平！ 互聯網圖片
五菱汽車（305）打橫行咗成年，未點鬱過，對應邊瓣，五菱係平到爆。
五菱主打汽車零部件、發動機，同專用車。尤其對上兩年，五菱盈利好爆炸，繼2015年盈利大增67%，上年，集團盈利亦增長70%，兼突
破億元大關，上到1.4億元人仔，靚仔到痹！五菱家陣PE得7.9倍，已經抵到爆。
中汽協數據，今年上半年，內地汽車產銷1,352萬輛同1,335萬輛，同比增加4.6%同3.8%，汽車產業經過上年高增長，喺高基數下，今年仲keep住溫和增長，已經唔錯。
又配合五菱自身，完成生產改進，打通青島、重慶基地，由單點製造，到南北聯動產業佈局，加埋食住一帶一路條水，五菱喺印尼設廠，喺競爭力同財路開拓方面，五菱應該掂當！
唔好計多，五菱今、明兩年eps增長20%到0.11港元同0.13港元，現價0.67元預測PE，得6倍同5.15倍，場內平霸。
又五菱一年累升12%，市值得12.3億元，五菱大股東五菱香港同關連人士，家陣揸五菱約72%股權，街貨28.2%或5.17億股，街貨市值3.46億元，細奀到痹，PB得0.9倍。場內涉及電動車瓣數嘅，有五龍電動車（729），家陣市值近70億元，暫時有盈利，市值係五菱市值5.7倍，PB講緊2.3倍。
又主打汽車零部件嘅同類股，有耐世特（1316），市值292億元，係五菱近24倍，PB3倍樓上，場內同業平均PB1.7倍樓上，五菱起碼平咗50%。
五菱上年下旬，發可換股票據，大股東係承配人，每股兌換價0.7元，五菱現價比呢板CN行使價，輕微潛水，亦講明大股東對五菱信心。
唔好計多，五菱現價翻半番到1蚊樓上，PB先得1.4倍，都仲未追到行家平均，又目標價明年預測PE7.7倍，仲係全場至平！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com