Can Bank：退休都係早啲計劃好
■及早為退休作好投資部署，起碼贏到時間值。 資料圖片
最近睇討論區，又有網民講起退休使費問題，正確啲嚟講，呢位網民係問，退休有100萬退休金，想用嚟買股票投資，希望日後每個月有兩到三萬使嚇。相信唔少投資者一睇都會覺得，難．度．極．高！
既
然網友已經去到退休年齡，更應該以保本為主，回報為副，100萬本想每個月有2至3萬使費，即係每年要有24至36%回報，相信連股神畢菲特都唔敢同你講佢間巴郡每年有咁嘅回報。更何況，畢菲特一直強調係要複息回報。
咁幾多先算係合理回報？還記得十幾年前，散子趁自己年紀仲細嘅時侯去買保險，保險經紀畀散子份計劃書，預期回報率就以8厘同10厘去計，呢個已經係當年唔太合理的高回報（因為咁多年來無一年做到）。
在多年QE之下，資金泛濫，時至今時今日嘅投資合理回報係幾多？藍籌股去年股息率（唔計特別息）高嘅係5至6厘；低嘅可以係零。以政府公共年金去計，每年就有4厘回報。
股市係咪真係無20至30%回報嘅投資？有！唔使年回報，單日都有，但亦都有唔少人只可以一日有咁嘅回報，一年埋單可能係相同數字嘅負回報！連職業炒股嘅老行尊都經常話，如果日日都搵到一隻咁嘅回報股票就好，你可能睇到難度有幾高。到最後，都係嗰句老土說話，退休早啲計劃好啲，起碼贏到時間值。
散子
散子
Can Bank - 散子 舊文
來源 source: http://hk.apple.nextmedia.com