智取大市 - 晉佳 2017年8月18日
智取大市：最佳選擇仲係佢
■恒指噚日倒跌，科網股一齊唞氣。 李潤芳攝
騰訊（700）業績遠勝預期，股價只係先升後回，恒指更加要倒跌，科網股一齊唞氣。另一重點係，噚日只有近期調整得多甚至大落後嘅股份先有得炒，資金棄強勢轉買弱勢，證明強勢股已經太貴，購買力要落到去最差嘅股票，睇嚟靠邊站等調整好過。
至於騰訊又如何，會唔會避得過調整？騰訊短線業績遠遠未去到改變投資者睇法嘅一步，升市最強勢係佢，調整市大家又靠佢頂住指數，甚至相對一般中資股更有避險用途，市值太大，資金無路可走，令到佢喺任何市況嘅安全系數都偏高（好似係），完美無瑕而遠未見到會犯錯嘅股票，大家靠佢開飯，唔去到最後一刻，都唔敢沽走佢。
喺7月中小弟曾經講過，雖然認為騰訊會一再破頂，但長線無須再當騰訊係股王看待，因為長遠收入增長空間始終會受到中國國民收入水平所制約。不過，對於有資金而冇炒股賺錢往績嘅投資者、以及未買股票而想買股票嘅讀者嚟講，騰訊始終係容易介入嘅選擇，佢升市途中調整、震倉幅度低，又至少跟足市場步伐，平易近人嘅個性，散戶捱貴價買佢，未來唔會發達，但若硬係要選擇而家27000點樓上先入市嘅話，騰訊似乎已算最佳選擇。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com