大熱倒灶唔係奇
2017年08月18日
恒生指數成份股執位，「豬內股」萬洲(288) 成為新貴，手機設備股舜宇光學(2382) 被形容為大熱倒灶。對於呢個結果，陸羽仁反而覺得合理。
舜宇上得急驚未企穩
舜宇光學呢隻股份，陸羽仁其實都幾欣賞，但講緊係佢30、40元時水平，當
時睇法係佢做嘅鏡頭，無論係手機應用抑或汽車都係增長好快嘅產品。不過近半年佢升勢好急，尤其近排炒佢成為新貴估值急升，就似乎有啲過急。依家恒指成份股有騰訊(700) 、瑞聲(2018) 都係科技股，若然加多隻舜宇，咁就有啲側咗。
雖然現代經濟科技好重要，但押後啲睇真啲都唔係壞事。今次入選嘅萬洲，幾年前已經傳過佢做新貴，但爭少少唔成事，過去一年佢表現回勇，其實都係實力份子，只係賽前手機股炒得勁，影響咗市場觀感。但如果從中期睇，萬洲嘅穩定性似乎高啲，唔知恒指服務公司決策諸公係咪人同此心，所以作出「爆冷」決定，舜宇倒灶可以視為塞翁失馬，未必係壞事。
恒指執位有啲反高潮，大市反彈波幅亦都開始收細，港股悶悶哋兼軟軟哋。恒指高開好快曾升215點，見27624創一周新高，其後升勢迅速回軟，中午前已經倒跌，恒指收報27344，跌64點；國企指數收報10801，成交964億元。
騰訊業績受讚，一度創新高341元後升幅收窄，仍升1.92%，收報329.4元，染藍失手嘅舜宇光學插咗2.7%，收107.2元，瑞聲都跌咗1.5%，收報113.5元，睇番過去瑞聲同舜宇嘅股價相差無咁近，呢次「升呢」失敗，沽壓可能無咁快消散。至於新貴萬洲升番2.8%，收8.2元，公司呢年表現較進取，加上所在市場經濟好番，做咗成份股無疑錦上添花，但呢類傳統股只係好性感嘅目標，想上車都唔使急。
今年股市上升，主要係好似騰訊呢類大股為主，好多細股不升反跌，主要係證監大力打擊殭屍股，不利炒作細股。不過，如果有家底嘅細股一旦價值被發掘，都照樣可以有好勁嘅爆發力。
好似做廠嘅世界集團(713) 啱啱公佈，會同花樣年(1777) 合作重新發展深圳廠房。根據建議，公司喺深圳市龍崗坪山新區面積約6.9萬平方米嘅地皮，將與花樣年合作重建，條件係對方負責重新開發及重建工程，世界集團就可以分回部份建成物業同現金。
股仔有時禾稈冚珍珠
有關公佈嘅建議寫得有啲技術性，但可以理解係世界集團出地，可以獲得等同價值約為13.04億元人民幣嘅物業同補償金現金3500萬元。
以公司發行股數7.5億元計，每股套現接近2元，而公司未公佈前市值只係得5億元，所以一公佈股價即刻急升。
陸羽仁
金融High Tea 舊文
來源 source: http://hdfin.stheadline.com