【實力取勝】趨勢投資者應該咁玩（陳承龍）（第138期）
2017-8-17 18:00:06
最近小弟睇咗黃國英兄嘅文章，都有啲啟發，特別係上次震倉之後，喺操盤上面可以有啲改善。
黃國英兄話「落雨收柴之後，下一步是等市場有回勇跡象之後再一次谷過，絕對有可能在27500又追過。26800
唔買，27500才出擊」，一般買賣計爭成700點先追入，隨時會被人話係傻仔，但跌咗落嚟，打逆境波，前路未明梗係唔好同佢博命，呢幾日小弟都有短炒，但係都係打遊擊為主，真係要贏大鑊，一定係個市升穿27500點以上，有返勢先再順勢行。
所以我諗，我係同黃國英同一類人，依家只宜小注持貨博幅度，寧願破27500點大手more，趨勢投資者就係應該咁玩，尤其打緊逆境波。
講返個市，大戶擺明睇住嚟食，係要趕散戶或冇實力者落車，尤其星期二尾市最明顯，好多隻重磅股刻意打落全日平均價之下收，譬如隻建行（00939.HK），U盤俾佢U低4格，騰訊（00700.HK）仲離譜，由321.2蚊U到落318.8蚊；但那邊廂內銀股周二早上升勢已言明一切，有心夾佢上去一啲都唔難，所以唔好畀佢嚇倒，依家最緊要是保持實力。
事實上，北韓驚嚇過後，中國商務部海關總署表示，自公告執行之日起，全面禁止自北韓進口煤、鐵、鐵礦石、鉛、鉛礦石、水海產品。中國終於表態，應該可以進一步明朗化。內銀板塊應該一直帶到月尾公布業績為止。現在的大成交顯示有大補空倉和外資基金買貨，因為睇淡了內銀幾年，怕的是可能業績有驚喜，到時冇貨就唔掂。
所以，首選都是中行（03988.HK）。因為：
– 對A股有17%折讓
– 有一帶一路概念
– 在全球很多城市有分行，大把中國金融市場國際化的商機
– 可以憧憬中銀和中銀香港（02388.HK）的重組概念可以很多
– P/B 0.79倍是四大內銀最平
再講一次，落雨收柴之後，下一步是等市場有回勇跡象之後再一次谷過，絕對有可能在27500又追過。
趨勢投資者應該咁玩：26800唔買，27500才出擊。
實力取勝 - 陳承龍 舊文
來源 source: http://www.winmoney.hk