智取大市：復蘇概念的賭注
■碧桂園喺高位回購，管理層似係有心用財技谷股價。 資料圖片
業績期尾聲，最吸睛嘅板塊都算係重工股，中國重汽（3808）半年收入增長73.7%之下，行政開支僅升16.7%，同時財務費用下跌，經營槓桿效應令盈利增長接近5倍！其實同龍工（3339）業績爆升邏輯相若。
2011年開始，重工行業同資源行業一齊進入咗接近7年嘅低迷時期，除起樓外，呢段時間較少民間資本大手投入重工業嘅投資，目前只係追返基本需求加上清除積壓嘅換機潮，都足夠嚟個短暫強力反彈。
唔止上述兩隻股，投資重工業板塊，都要作出一項賭注，博到內地未來經濟進入真復蘇，就贏；如果喺經歷工業設備供求正常化後，長遠需求未能pickup上去而形成假復蘇，就會輸。呢個答案太難估，暫時股價反映投資者正在投復蘇一票，中短線就趁勢跟住先。
除此之外，內房股升咗咁耐，碧桂園（2007）喺股價高位時再回購，係曲線話畀大家聽，管理層有心用財技谷股價，睇嚟見恒大（3333）爆升後，碧桂園都似有後著。
港股方面，短線未有見頂訊號出嚟，都係保持「順勢而行」四個大字。同時要每日檢討走勢以盡早察覺唔對路要減持，又或者突然間極端亢奮時，就再檢討持股策略。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com