不問價追 - 小炒王梁心欣 2017年9月1日
【不問價追】倍升之旅有信邦（小炒王梁心欣）（第140期）
2017-8-31 21:00:09
近期小炒倉成功一注獨贏中金公司（03908.HK）。食過翻尋味，我發現咗新目標，呢隻就係近期上市的信邦控股（01571.HK），相信大家無關注過，小炒王都係睇到佢第一份業績先做到決定叫大家買。
先講啲基本資料，信邦係國內領先汽車塑膠電鍍零件供應商，即係汽車零部件，由做模啤膠到電鍍，為主流汽車品牌提供服務，公司大客包括北京奔馳汽車及沃爾沃汽車，好簡單咁諗，吉利（00175.HK）升爆，信邦就食正呢個汽車浪，未來幾年市場陸續換電動車，信邦的生意應該做唔曬，除非你話吉利，BENZ等無人買囉！中期業績入面展望有一句「我們的訂單情況良好，且我們手頭獲得的訂單推動我們於未來幾年的業務擴張。」即係話啲訂單做到手軟，同埋有增長空間，小炒王睇到業績呢度，已經知道心水倍升股就係佢。
睇埋招股書同網上資料，更加確認到信邦會係好勁的倍升股，首先就係公司創辦人馬曉明先生，馬先生係中國哈爾濱工業大學應用化學系畢業，主修電化學生產工藝，正正因為老闆讀的專業就係呢度，所以做到產品合格率高達九成，領先同行大約5%，大家唔好睇少呢幾個點，建溢（00638.HK）業績咁勁都係靠提升產品合格率，大家都同我一齊經歷過建溢，相信今次又可以一齊見證信邦的倍升之旅。
再者，今次信邦上市，搵來的基石投資者真係好勁，就係大名鼎鼎的雄牛資本。雄牛有幾勁？佢成名作就係投資京東（JD），而雄牛資本的負責人Gilbert Wong以前是著名的投資銀行家，曾經負責過嘅項目包括比亞迪（01211.HK）、長城汽車（02333.HK）、中國蒙牛（02319.HK）、舜宇光學（02382.HK）、玖龍紙業（02689.HK）等勁嘢，全部上市後都炒起碼一倍，中長線梗係明星白馬股，所以今次雄牛入股信邦，睇1倍真係好保守。
另外，信邦今次上市唔同其他新股出現大股東套現或基金套現的現象，信邦未上市前借貸金額只有500萬，今次上市集資主要目的就係去墨西哥開廠，通常呢種開廠都係跟客戶，所以已經確認到係長期合作夥伴，訂單一定有保證，換個角度去睇，就係增長潛力，呢個係信邦的加分位。
信邦新鮮出爐的業績好靚，每股盈利人民幣0.23元，較去年同期增長27.77%，而且仲派息人民幣0.05元，而目前人民幣兌港元匯率1.18來計，全年保守估計賺0.54港元，計10倍PE嘅話，信邦第一站目標係5.4元，而小炒王個人相信信邦係增長型股票，每一次出業績只要對辨就有機會大升，現時股價仲輕微超過IPO價3.42元，而且經歷過大圓底收集期，downside risk有限，但係上望空間無限，點睇都好應該買入1571。
不問價追 - 小炒王梁心欣 舊文
來源 source: http://www.winmoney.hk