中環在線：純官康復進度好 今明或蒲頭？
■純官（左）一早準備交棒畀大仔Adrian，無後顧之憂。資料圖片
新世界發展（017）主席鄭家純今年初中風，出院後一直在家養病，傳媒每次見到佢大仔鄭志剛（Adrian），都要問候純官近況。Adrian早兩個月講過，純官健康非常好，估計可以出席
集團下次業績會。嗱，同系新創建（659）同新世界發展就將於今日同明天開業績會，究竟純官會唔會現身呢？
消息人士透露，純官康復進度良好，精神唔錯，頭腦仲係好清晰，講到說話亦行到，可能只係慢少少。如果佢老人家心情靚，出席業績會都不出為奇。不過，純官一向係傳媒甜心，有問必答，答到大家冇問題為止，純官亦可能想以最佳狀態示人，總之就係心大心細喇。
養病保密做到足
純官呢次病倒，保密工夫的確厲害，照計佢都要出出入入去醫院覆診，間唔中都有出嚇街，但冇乜人影到佢病容，搞到大家真係幾掛住佢。又好在佢一早準備交棒，第三代嘅Adrian喺集團工作超過10年，基本上有自己班底同發展理念，市場對呢位接班人開始受落，純官可以安心養病。
講開又講，Adrian早兩個月喺周大福（1929）股東會估計純官可以出席業績會，話唔定，佢係講緊周大福11月嘅中期業績會！
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com