手機股第一滴血
2017年09月20日
恒生指數周一急升後噚日跌返過百點，但仍守住兩萬八千點關口。大市呢次衝關力度增強左，一舉剷左過百點收市，但係咪企得穩仲要觀察。雖然指數造好，但呢兩日手機設備股就跟唔上大市，曾經熱炒嘅新貴丘鈦(1478) 更加連跌兩日，累積跌幅唔細，反映左買呢啲
高估值股份嘅風險。
丘鈦主要從事高端手機鏡頭，以及指模識別模組嘅設計生產。由於今年新生機陸續出台，而且主打高價產品，公司股價今年急升，呢個情況直至個幾星期時出現改變。集團管理層喺股份短暫停牌後披露，今年一至八月份攝像頭模組累計出貨數量增長約11.6%；按照目前累計總出貨量，以及對本年度餘下月份嘅出貨預測，未必能夠實現年初訂下全年增長25%嘅出貨指引。因應情況，管理層將攝像頭模組出貨數量指引，修改為預計按年增長不低於10%。
丘鈦升幅以成數效應計算
根據公司解釋，調低出貨量原因有兩個，第一係客戶陸續投入量產新項目提出更高規格嘅要求，佔用人力同設備產能超過預期；第二係產品結構持續優化，雙攝像頭比例上升，但喺統計口徑上僅按一顆計算。
咁即係話出貨量增長低於預期，一係因為雙鏡頭只當一個計，令計數上有影響，經營上嘅衝擊應該細啲；另一個就係鏡頭規格要求高左，無做得咁快，咁究竟會唔會影響埋成本就冇詳細披露。
丘鈦公佈後市場反應唔大，股價仲一度反彈，不過大戶似乎愈睇愈唔對路，股價慢慢開始下滑。噚日最低插到去12.7元，收報13.06元，同高位23.25元差左43%，如果高追都已經幾傷。丘鈦喺急跌之前，係今日升幅最大嘅股票之一，佢由一年前低位三元起步，一路直衝高位，差唔多有成七倍升幅，依家雖然急跌，但市盈率仍然高達63倍，息率只有0.3厘。
佢咁跌法有人會問係咪可以撈底，有中環茶友話，好似呢類高市盈率嘅股票，估值真係藝術，因為數字上佢依家係60倍，之前係100倍。股票10倍市盈率通常唔係貴，20倍有啲高，但去到50倍，咁同60倍、70倍分別有幾大，就令人覺得有啲虛無飄渺，好講感覺。
丘鈦有咁高估值，主要係市場覺得佢有高增長，依家發覺佢未必係咁，來年盈利未必計到數，加埋估計調低，2乘2等如4，調幅係乘數效應計算，所以佢升上嚟可以咁勁，調落去都一樣，所以佢股價幾時可以企穩，係要睇市場對管理層嘅信心幾時可以恢復，無一條方程式計算。如果之前冇賺過錢，依家當然唔使急於走埋去撈底啦。
花旗遲來唱好內房股
手機股無運行，瑞聲(2018) 跌左1.7%，報141.4元；高偉電子(1415) 跌3.2%，報3.67元；舜宇(2382) 跌2%，報127.4元。大市繼續消化勁升過百點嘅獲利貨，恒指收報28051，跌108點；國企指數收報11125，下滑70點，成交金額996億元。融創中國(1918) 繼續搶鏡，急升9%，收報37.6元。內房股呢排大炒，中國新城鎮(1278) 急漲21%，報0.4元；合生(754) 升21%，報9.64元；眾安房產(672) 再升10%，報2.47元；中海宏洋(081) 升7.6%，報5.95元。花旗發表報告，上調內房股目標價平均13%，依家先出唱好報告，時間上係咪遲左啲呢？
陸羽仁
金融High Tea 舊文
來源 source: http://hdfin.stheadline.com