智取大市：冇亢奮就有危險
■當市況不再亢奮之時，下跌空間可以相當大。 資料圖片
恒指上星期五市況急轉直下，輕微跌穿保歷加中軸（延伸至27883點），上期講到指數明顯跌穿呢個位就減持避險，所以今日市況繼續弱嘅話，都難免要減持至安全水平，被逼轉軚。
年頭博到𠵱家，冇乜遇上大跌市，仲要升嚟
升去都係同一批強勢股，有炒開嘅戰友，難免買到成手都係累積升幅好多嘅股票，繼續博強勢股絕對係高風險動作，一旦情緒再唔亢奮，真係搵鬼同你去博，個個先走為敬。
9月至今，恒指沿住保歷加通道中上軸上漲，喺中軸連續兩次形成支持，上星期五未能收復中軸以上收市，走勢已證明差過9月15日跌破中軸再拗腰回升嘅表現，打破短線一浪高於一浪嘅走勢。
喺星期五，熱炒股完全冇即市反彈動力，比起9月以來任何一個單日調整市嘅形勢都要差。另外，近期如內房股、汽車股、手機設備股嘅升勢實在勁得可怕，經歷周五跌市之後，剩番內房股、舜宇（2382）、騰訊（700）走勢未轉差，可見強勢股獲利沽壓唔講得笑。面對市況不再亢奮之時，下跌空間可以相當大，目前買個保險，先採取保守策略，保住盈利，留待下一次上陣博殺要緊。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com