【實力取勝】直播講股威力你feel到未？（陳承龍）（第144期）
2017-9-28 17:30:39
小弟自從搞咗策略王直播室之後，忙到飯都冇時間食，日做夜做，大家主觀覺得成日去蒲嗰一個我，已經慢慢喺地球消失，加上有個寫嘢唔經大腦嘅人傳我爭人孖展。但，其實我真係爭孖展，仲爭咗20
年，點解爭人孖展？咁你就要聽我講啦。
假設你有100萬啦，未有孖展之時，咪只有可以買100萬咯。當你搵到有間經紀行，可以入10萬炒20萬嘢，梗係即刻仆去開戶口啦，呢個時候就有110萬可以用嚟炒，重覆以上動作多9次，100萬就可以當200萬炒。咁有乜好處呢？以前買100萬貨升1成，就賺10萬，依家用100萬錢借100萬孖展買貨，升1成就賺到20萬，數係咪咁計先？當然好多人問，「賺就爽啫，蝕點算喎」，喂，買股票梗係買升嗰啲啦，唔通買跌嗰啲咩（《高明頂》個「財毀會」玩嗰咪嘢就例外）。
就好似小弟咁，用1000萬錢喺相熟經紀借到3000萬，日日炒出炒入，最開心唔係我，係我經紀呀。咁炒法，小弟其中一個經紀一個月齋袋成30萬傭，已經計埋佢公司扣咗嗰啲喎，真係爽過好多金融才俊，經紀話呀，驚我借孖展借得少咋，因為我炒個銀碼細咗，直接損害佢收入，港交所（00388.HK）嘅交易徵費、印花稅嗰啲濕星錢都會少咗，所以呢，借孖展係對社會有貢獻㗎。
講返正題，自從有咗小弟呢種style嘅財經直播節目出現後，吸引咗唔少股民同非股民目光，有人讚好有人讚唔好啦。其中有人話小弟呢類節目冇深度，評論一隻股講幾句，唔及內地啲網站咁深入分析喎。第一，香港文化嘅現實係，網上世界講好多正經嘢都唔會好收視，唯獨無聊、呃Like嘢先吸引到眼球，呢個係事實；第二，炒股長篇大論分析真係好？你估個個都係分析員呀！炒股其實好講即場決定，同做人一樣要make到decision，所以大家可能見好多炒股搵到錢嘅人，都係一啲比較決斷嘅人，電光火石間做出買賣決定，睇完篇咁長嘅文，trading hour都完啦；第三、有人話內地嗰啲成萬字文章先踢得鬱股價喎，就計9月26日我推隻首創環境（03989.HK），我朝早0.33時叫曾美華買，佢買完我先take，到《十二點半陳承龍》推介時越升越有，到收市收0.39，停機前乜位沽到贏，呢啲係乜嘢？仲有呀，啲人成日話小弟派貨，係呀我係派貨呀，我幫大家派貨呀嘛，晨早叫大家0.33掃首創環境，上齊車後嗌到基金都出嚟搶貨搶到day high收，26號隻嘢1.14億錢成交呀，唔會係「陳承龍效應」啩？
實力取勝 - 陳承龍 舊文
來源 source: http://www.winmoney.hk