眾安無乜肉食
2017年09月29日
九月份好快過去，港股臨近期指結算有壓力，指數晏晝沽壓沉重，睇嚟大市都要喺兩萬八千點關口下低收，雖然係咁，但今年首三季大市都有進帳，表現已經比預期好。十月份係傳統股災月，加上過去逢七多災，指數冇咁瘋狂，睇嚟都唔係壞事。
壹傳媒賣仔一頭煙
噚
日茶友講股外，八卦話題之一係壹傳媒(282) 出售旗下周刊一波三折，本周刊賣盤俾商人黃浩，本來已經準備交收，唔做嘅員工同作者都買定散水餅，喺專欄預告話一個時代終結左，點知大家搞到離別情緒好濃之際，公司忽然發通告，話交易要延遲。公司旗下報紙就引述消息話，買家想等埋台灣投審會批准至完成交易。
唔理乜原因，賣仔交易臨尾搞到一頭煙，壹傳媒因此要求買家喺未來幾日增交訂金二千萬，同埋負擔期內營運所蝕嘅錢。呢單交易咁拖一拖，大家即刻滿肚疑問，因為若然交易成功，壹傳媒可以收番三億二，都可以頂一頂。萬一只係萬一交易失敗，本雜誌搞到散晒檔咁款，隨時就咁玩完，幾億就可能蒸發左。o依家壹傳媒市值已經好殘，得番九億多啲，所以股價都對交易拖遲無乜反應，收報0.38元，微跌1.3%。
睇番今次延遲交易，雙方無交代原因。由於黃浩之前透露會出售旗下嘅《都市日報》，所得嘅錢會用嚟買大嘢，所以外界估計今次安排同賣《都市》聯想起嚟，皆因話賣咁耐，一直都未見買家現真身。當大家將兩個交易放埋一齊睇，壹傳媒旗下網站就披露，《都市》買家係一個姓蕭資深傳媒人代表嘅財團，似乎想話俾外界知《都市》交易有著落。
呢個蕭生以資深傳媒人姿態出現，有中環茶友識左佢幾十年，認為更加適合佢嘅形容詞係「資深炒股人」。雖然好多年前佢做過報紙老總級人馬，但近呢二十年基本上都係寫吓炒股欄，佢嘅興趣似乎係炒股搵銀多過做傳媒人。茶友話，如果佢要做報紙，老早應該已經做左，睇唔到o依家點解要合夥用幾億去做報紙囉。
黃浩高價買壹傳媒旗下周刊，呢本周刊近年收入同讀者大跌，虧損嚴重，有銀有橋如壹傳媒老闆黎智英都要跳船，黃浩接手除左要有幾億支付交易代價，仲要預番大筆錢去泵水，可能都知呢個窿唔易填，所以未接手《壹週刊》前，行內已經有消息佢會叫停自己現有周刊，實行移形換影，咁搞法最後會點收科，就真係難估過中秋金多寶咯。
季尾食胡有沽壓
大市彈完一日再插，臨近收市見到有沽盤，恒指收報27421，跌220點；國企指數收報10874，下滑161點，成交892億元。恒生指數喺第三季初唔夠26000點，最高升左超過2000點，內房、汽車、手機板塊大升，去到季尾大家計吓數，沽啲貨套現預備換馬好正常，單係呢浸食胡潮都已經有唔少貨沽出嚟，所以噚日好多累升得多嘅股份都回得甘啲。吉利(175) 收報21.8元，跌咗3.5%，係跌幅最大藍籌，平保(2318) 雖然有一脈相承嘅眾安(6060) 上市，股價都照跌，收報59.4元，跌2.6%。
至於焦點嘅眾安在線收市較上市價升9.21%，收報65.2元，全日最高見過70.5元，交投有65億元，轉手率唔算係好高。以佢收市嘅升幅不足一成，一人分一手只有100股，帳面袋550元，扣除手續費食肉唔多，係呢啲位再計數食胡嘅興趣已經唔係咁大。
陸羽仁
金融High Tea 舊文
來源 source: http://hdfin.stheadline.com