【不問價追】從生活發掘好股（小炒王梁心欣）（第144期）
2017-9-28 21:00:57
上周港交所一口氣發出「上市發行人集資活動」與「除牌及《上市規則》其他修訂」兩份諮詢文件， 相信影響最大的就係「向下炒」以及僵屍企業，對此，小炒王有更多睇法。在市場除去向下炒這個
情況下，相信會令到北水更安心咁買港股， 因為中途轉手向下炒係防不勝防，David Webb就中過伏，買過做BB車的隆成（01225.HK），呢次相信會迎來北水的掌聲支持。第二樣就更重要，又多一間上市公司被DQ，呢類僵屍股業務唔多，核心資產缺乏，平時更無乜成交，退市可能係最好的選擇。對無實力的殼主來講，今次係一大威脅，因為隨時連殼都失去，未來好大機會，見到僵屍股的成交返來，而且加速轉營或易手，否則一隻隻被DQ離場。小炒王分享完睇法，唔知大家認唔認同長遠利好港股市場，更利好港交所（00388.HK），小炒王重申一次，港交所積極做好市場，現在買入中長線回報唔錯。
話說上周五，小炒王見個市唔炒得，就提高收工去做返個Facial，既然呢行咁好賺，更係搵下港股裡有邊間值得投資啦！主板搵到自然美（00157.HK）同埋現代美容（00919.HK），因為佢地Cash flow 好強，屬高派息紀錄的公司，小炒王有個朋友很喜歡自然美這個品牌，而其他嘅都唔使點睇。創業板裡，基本上小炒王都唔會睇，而黎姿的卓珈控股（08358.HK），會觀察佢未來幾年的業績等營運數據啦，如果她堅持佢細佬的心願，努力營運好間公司的話，小炒王係會支持式建倉博佢轉主板，不過如果突然無啦啦走去供股等，就唔使再睇。其實大家可以留意一下公司過往表現，持續派息值得加許，相反持續供股則要加強戒心。係復星醫藥剛剛分拆出來上市的SISRAM MED（01696.HK）值得講嚇。
SISRAM MED係香港首家上市的以色列公司，是全球領先的能量源醫療美容器械供應商。大家如果有去過做FACIAL，就會聽到美容師話有新機，個機又點勁勁勁，而且有幾貴等等，佢哋講的機就係呢間SISRAM 有份推出的。唔知大家知唔知，以色列的美容產品都好出名，例如好貴嗰個海底泥。唔講咁遠，講返小小SISRAM MED基本面先。
SISRAM早前以8.88至12.35元招股, 總共發行1.1億股，引入3名基礎投資者，分別為上海自貿區基金、基金公司升泰及紐頓醫學美容集團（Neo Derm），主要做能源治療系統、包括激光、強脈衝光等醫療設備，是全球第五大能源醫療機械供應商，更加係中國市場最大，市佔率大約16.2%。公司研發團隊有47人，目前有38個注冊專利以及10個專利在申請中。
公司PE 大約4X 倍，預測PE 2X倍，市值35.4億左右，單單從PE 去睇，大部份人都會話貴。不過以市值以及行業獨特性去睇，呢間公司係剛起步，屬合理股值。但小炒王睇嘢係睇將來，首先中國人已經富起來，對美容需求都大，睇返香港例子就知，慢慢係會普及，加上有復星支持下，前景係唔錯的。
而呢類分拆出來獨立上市的公司，好多時候會併購同業去擴展市佔率，小炒王相信SISRAM 係會愈做愈大的模式，以目前市值35.4億來睇，第一步目標好大機會係50億以上進入深港通，到時候好多引入更多內地投資者，金斯瑞生物科技（01548.HK）咪係一個好嘅先例，上市至今升了好多倍，現時市值超過百億，點解？因為北水鍾意呢啲主題，而且公司獨特性較重，香港上市的只得一間。第三，如果大家有留意復星（00656.HK）近日的股價，就知公司已經脫離政治陰霾，無咗political discount後，北水全力買，所以小炒王決定呢個時候連同小炒倉買入SISRAM，博係下隻信邦咁大賺。（其實小炒倉唔想沽出信邦，但係好多朋友留言話跟唔到，有冇下隻，我就搵到SISRAM，現時股價同招股價唔差好遠，$8.88上市絕對值得吸！）
不問價追 - 小炒王梁心欣 舊文
來源 source: http://www.winmoney.hk