【不問價追】十九大的秘密武器（小炒王梁心欣）（第141期）
2017-9-7 18:24:10
週末金仔突然核試，第一時間小炒王就諗翌日開市會點，上次差唔多打時跌一千，千幾億成交，散戶啲資金被大戶收曬後衝上28000。今次會否再來震倉，小炒王唔知，但係週末都好多新聞出來，小
炒王覺得出現咗唔少投資機會。
首先，「金磚+」，以前互聯網+就聽得多，「金磚+」就係第一次聽，簡單講就係金磚五國+其他發展中大國和發展中國家組織進行對話，建立更廣泛的夥伴關係，擴大金磚的「朋友圈」，重點就係把中國自貿區推廣到呢啲國家，為一帶一路大計打咗支強心針。
十九大將於10月18日開幕，首先推出嘅就係京津冀大氣汙染防治行動計劃，又準備踏入秋季，霧霾問題又隨時出來，環保股應該係下半年熱炒主題，率先為大家選出環保股心水。
講起環保股，觀眾朋友們都知小炒王一直喜歡中國光大國際（00257.HK），自從佢分拆後我覺得個仔中國光大綠色環保（01257.HK）好炒過阿媽，不個小炒王環保股首選就轉咗天津創業環保股份（01065.HK），聽個名就知食正京津冀大氣汙染防治行動計劃。
業務方面，天津創業環保股份主營業務為汙水處理設施投資建設、運營及技術咨詢服務、再生水生產銷售及管網接駁、自來水供水、新能源供冷供熱服務以及道路收費業務。
小炒王記得有一次同某台北美台台長食飯，講起雄安，她好關心白洋澱汙染問題，你知啦，小炒王對國情好多都唔識，所以飯後特登返去百度一下做功課，原來白洋澱係河北省最大的湖泊，就正正係雄安新區核心的水源，目前汙染情況都幾嚴重，所以最受惠的股份好大機會就係天津創業環保股份。
天津創業環保A股係雄安大計宣佈後就開始展升浪，由8蚊升到最高24.93元，近日就係18蚊邊上上落落，但係港股呢邊無乜反應，都係4.8至5.6邊上落，A股貴H折超過3倍，小炒王個人覺得港股呢邊市場唔知國情，完全唔知道天津創業環保潛力有幾大，所以目前折讓咁大時，反而係低吸的機會，恒大，融創等股票爆升令小炒王對投資有新的體會，所以小炒王覺得現時買入天津創業環保，未來應該有一兩倍回報。
講到AH股，好多人覺得已經唔得，上個星期仲有啲朋友笑小炒王，但係大家認真諗下社保基金開始加碼來港股，AH係一個好易睇嘅指標，未來一定唔少操盤的基金經理以呢個AH差價去炒，現時仲係平，點解唔收集平貨？
不問價追 - 小炒王梁心欣 舊文
來源 source: http://www.winmoney.hk