唔炒大股炒落後
2017年09月08日
美國債務上限暫時鬆綁，美股反彈，港股開市雖然回升，但有上市公司宣佈抽水，令投資者戒心增加，大市先升後跌收市。指數未能跟隨美股反彈之餘，熱錢可能覺得唔玩大股，轉向炒吓落後仲抵玩。
批股抽水動作增多
恒指上到重大心理關口，上市公司抽水增多。申
洲國際(2313) 兩大股東按每股58.6元配股，涉及5500萬股，套現32.23億元，配售價較昨收市價62.85元，有約6.8%折讓。禹洲地產(1628) 就以先舊後新方式，配售最多3.5億股股份，相當於已發行股本約9.13%，配股價每股4.53元，較昨日收市價每股4.93元有約8.11%折讓，集資15.64億元用作未來可能投資。
兩間公司配股性質有啲唔同，申洲似係大股東覺得股價都差唔多，於是配售自己手持的舊股出街，食胡袋番啲錢落袋。申洲過去幾年盈利持續增長，公司無乜負債，早前仲提前贖回於2019年到期的可換股債券。公司狀況相當靚仔之餘，近半年股價剷上62.85元，市值去到成千億元，市盈率有25倍，都反映左美好嘅前景，大股東揀係呢個時候袋番幾十億暖袋，係好合理的諗法，但股價就好有可能見左頂。
今年優質工業股普遍表現跑贏大市，最大板塊係手機設備股，其他好似申洲表現都唔錯。工業股股價突出，有本身做得好的後天因素，同時全球經濟復甦的先天因素都好重要，做廠有起有跌，本質有循環股的因素，廠家見慣風浪，自然明白見好要收，就算股價短期或者沽平左啲，都係儲定銀彈穩陣啲。
下個星期蘋果就會發佈新手機，屆時可能掀起一片搶機潮，但炒開手機板塊嘅投資者，就要留意會唔會有反高潮，特別係股價升得多，大股東有吸水誘因的股份，就要睇得緊啲。
內房股抽水動機就有啲唔同，內地房地產今年仲係好景，但經過兩年高速增長，係十九大後房地產市場政策唔知有無改變，加上銀行陸續收緊對地產開發的貸款，係咁環境下，部份公司就會趁股票有價集吓資。
好似之前中駿置業(1966) 批左股，而家就到禹洲，佢地都屬三線的內房股，今年隨大市升到高位，有機會就伸手，主要係有資金需要，籌到錢用番係公司業務，相對大股東抽水算係有積極一點的意義。
大市昨日先升後軟，恒指曾高開逾200點，但午後轉升為跌，收報27522，跌90點；國企指數收報11098，下滑30點，成交1004億元。友邦及騰訊為跌市元兇，友邦跌1.75%報收58.8元，為跌幅最大藍籌股；騰訊收跌1.11%報320.6元；兩股合共拖低恒指71點。
恒地(012) 獲大行唱好，股價再創一年新高，收報49.95元，升1.7%，禹洲地產(1628) 批完股急挫6.3%，收報4.62元；碧桂園(2007) 就逆市急升6.5%，收報11.84元。資金搵嘢炒，金斯瑞生物科技(1548) 該公司被中信里昂點名為倍升股的港股，午後突然爆上，曾造9.32元，收報8.34元，升逾一成，但高追者就暫時坐左艇。
賣產收水精神爽
和電香港(215) 昨日舉行特別股東大會，通過以近145億元出售固網業務(HGC)，主席霍建寧講到日後會否考慮派發特別息時表示，要留待12月董事會議上再議，強調現時仍未收錢。講到上市公司賣產分錢，係要一段時間，好似隻建業實業(216) 同漢國(160) ，年初賣出廣州項目，大賺22億元，股價回吐左一排後呢兩日開始升番，據講就係交易完成收到錢，所以表現即係精神一振，建業收報3.97元，升左8.5%，漢國就收報5.07元，升10%。
陸羽仁
金融High Tea 舊文
來源 source: http://hdfin.stheadline.com