【實力取勝】執輸行頭慘過敗家（陳承龍）（第141期）
2017-9-7 18:13:13
話咁快又一個禮拜，過去呢個禮拜，都唔算悶，都叫做有得炒，尤其細價股，一隻恒騰（00136.HK），帶返曬大部分都有一陣鑊氣，只要你肯落注，隻股質素又唔太差的話，都可以來個靚抽。點解會咁？好簡
單，因大價股業績已出，已炒的都炒了一段，加上肥仔恩得閒又玩嘢，所以變咗冇乜人走去博大股，做就咗資金轉炒細股，加上交易所又唔畀細的上市公司隨便供股或配股，搞到好多大戶唔可以隨便印新股向下炒，唯有掉返轉頭向上焗炒，也因此做就今次細價股炒風。
可以炒幾耐？我唔知，不過好似Keep到幾耐，唔係兩日貨仔，睇勢，或者可以維持到多一陣。都係以前講過的要點，一切還看市值，就算面價好平，但實際市值好貴，就無謂衝，反之，市值細到連殼價都未到的，就不妨一博。由於細價股日日有，我不在此專欄介紹，想即日搵股落鑊，記住睇實《策略王直播室》的直播節目，同埋《12點半陳承龍》的即市推介。
至於大市，9月份我依然睇得唔淡，因為呢隻慢牛有中國照住，一來十九大就開，我估十九大之前，一切都係以穩定為主，所以應該ok。仲有，有一點值得一提，就是人民幣升值因素。淨是人民幣這兩個月升7%，2823，2822 和 3188 由於匯價已經升了7%，所以來緊淨係匯水估計已經有2%至3%升，再加埋A股價7%-8%升，ETF 有機會一個月內升10%。
我最喜歡3188，因為A股如果升是因為多了散戶參與，而散戶喜歡買中型股，所以3188會得益，因覆蓋範圍是300隻股票。明年6月入MSCI 雖然被動基金只會買大約180億美元A股，但主動型基金和散戶的胃口可以大幾十倍。既然要買，早買便應該平一些，12月買貴一些，出年5月買更貴。好像香港樓市一樣。執輸行頭，慘過敗家。
細價濠賭要睇實
仲有，短期要睇實細粒濠賭股，因為小弟收到風，澳門新口岸利澳酒店想賣，叫價60億元。利澳本身位於澳門新口岸中心地帶交通方便，附近酒店賭場林立。 該酒店佔地面積3142平方米，即33820呎，建築面積實用58023平方米即624560呎，建築面積892228呎，樓高24層。設有總統套房、豪華套房及標準套房449間，設有大小會議室、中西餐美食餐廳、水療芬蘭浴室及各類珠寶店。有一個貴賓廳及中埸共63張賭枱。賭牌租期到2020年，到期可以續期。年除稅淨利潤約3億，如果真係賣得成的話，都係20倍市盈率，頓時令到同區的酒店的可升值，因為同區冇乜酒店賣，同區而又有上市的有英皇娛樂酒店（00296.HK）同澳門勵駿（01680.HK），前者廿幾億市值，後者得70幾億市值，相比利澳個叫價60億元，真係好抵，所以可以諗諗。
實力取勝 - 陳承龍 舊文
來源 source: http://www.winmoney.hk