中環在線：
恒隆太子最愛新香園蛋牛治
■新香園嘅蛋牛治夠真材實料。高淑孄攝
深水埗有間以蛋牛治馳名嘅「新香園」，如果佢要搵名人幫手做代言人，恒隆地產（101）主席陳啟宗長子陳文博應該幫到手。此話何解？皆因大家如果問陳文博有乜美
食推介，佢多數會提議新香園。華華當然唔執輸，走去幫襯過新香園，試過呢度最出名嘅蛋牛治同紅豆冰喇。
呢度嘅蛋牛治之所以馳名，主要因為佢哋唔係用罐頭免治牛肉，而係用新鮮牛肉，連雞蛋即叫即煎，麵包烘底更加正，一份廿蚊，經濟實惠又好味。
放假帶老婆行鴨寮街
新香園經營咗幾十年，內裏佈置裝修當然都有番咁上下歷史喇，搭枱也是常識吧，估唔到陳文博貴為富三代，都會肯去幫襯。之前聽過佢講，佢放假會帶埋老婆一齊行深水埗鴨寮街，周圍八卦嚇，然後去食件蛋牛治。（唔知佢有冇叫過爸爸去呢？）
如果唔去深水埗，佢同老婆就會揸車入去新界周圍睇嚇，事關佢哋一向住港島，唔熟悉新界區，所以得閒就會開個Google Maps，入新界兜番幾轉。佢可能順道了解埋本地樓市行情啩，雖然恒隆喺香港已經冇乜樓盤可以賣，但作為未來接班人，了解嚇都好應該嘅，萬一有日要同林鄭討論農地起樓問題，佢都起碼都知道農地在哪兒吖！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com