【不問價追】港交所是你首選（小炒王梁心欣）（第147期）
2017-10-19 21:00:43
大市升到呢個位，港交所仲係壓住在230蚊樓下，小炒王真係覺得超值，首先美圖（01357.HK）同埋眾安（06060.HK）成功示範到新經濟股在港股市場都好有吸引力，高估值上
市仲熱炒，騰訊（00700.HK）見到都立即分拆閱文，未來仲有平保（02318.HK）的陸金所、阿里的螞蟻金服等等，小炒王見到個勢已到來，暫時欠一個催化劑令港交所爆升幾十蚊的契機，早前叫政府減印花稅算係食咗個小詐糊，但在我心目中IPO通先重要。
IPO通會係一個咩概念？就係北水直接落來港購IPO，我們也同樣可以去A股抽獎，小炒王新入行時，港股單是抽新股都可以賺大錢，未來IPO通多了咁多北水，係難中咗，但係好處就係呢啲新股應該直接入咗港股通，成交更活躍。另外就係多咗大公司、潛力股會選香港為上市首選地，如果多幾間好似QQ咁有潛力的公司來港，做大個餅，人人有好嘢食，而香港會慢慢成為係亞太區最強的金融中心，同樣大家多咗好多機會。
講到呢度，大家有冇留意小炒王講「分拆」呢兩個字，大家都知港交所有意推創新板，而近日眾安在綫證明市場對新科技係接受到高估值，係咁嘅情況，港股將會係好多中國新科技股上市嘅目標地點之一，港交所遲早都會大放異彩，2015年大時代嘅300蚊遲早都見到，而點解仲未破到52周高的$233.2，好明顯就係大戶未收夠貨，但睇圖10月、11月隨時一舉突破而上，大家真係要坐定定。
早排睇到新聞關於證監會建議，若果大家一連兩日來回顧，第一係孖展融資對細價股大幅收緊，第二就係要加強識別以及打擊「邪惡集團」，目標把他們剷除。這兩件大事加埋來睇，小炒王覺得對市場短暫係有影響，但長遠來講，港股市場會更加清新，有利北水大舉進軍港股，加強小炒王對呢個超級牛市的信心。
加上發現資金繼續流入中港市場，好明顯就準備緊明年嘅MSCI，首階段料流入約180億美元，好似好少咁，但係大家要諗下實際影響會有多少？呢個係匯聚全球資金的一個大事件，所以小炒王相信現時兩萬八、兩萬九，距離牛市頂部仲差好遠，唔好被牛市中嘅震盪而震走。
港交所股價明顯落後，我一早就同大家講，幾時會見300蚊小炒王唔知，但可以話300蚊絕對唔係個頂，中國股市現在互聯互通，同10年前直通車個方向係相類似，但仍有好多未實現，例如港交所會唔會同上交所、深交所互換股份，合力打造一個超級交易所？只要大家細心一諗，港交所係可以有好多憧憬，講真現價仲係好安全，未上車嘅朋友不妨考慮穩坐港交所呢個超級列車。
不問價追 - 小炒王梁心欣 舊文
來源 source: http://www.winmoney.hk