【大茶飯】承認自己半桶水（青冰）
星仔在爭議聲中以點數擊敗日本仔，完成22連勝，好多半桶水的觀眾，只係為睇熱鬧的心情觀戰，其實都唔太了解拳賽的規例，不過佢地的批評聲就最大，青冰比半桶水更少，最多都只係問點解嘅點解嘅，亦唔會講出黑哨主場雞這些反智之詞。
股民兩星期前會問，點解眾安(6060)
咁曳架，季結前仲隊到63.45收市，傷透股民的心，食糊的、打靶的，不計其數，好多分析員就走出黎話，其實間野成千倍PE，市賬率超過4倍，比同業的1.5倍，差咗一截，好難唔跌囉，挾三馬之名先可以用呢個價上到市！
不過去到上星期，股民態度180度轉變，問點解會升咁多架，哦，又三馬又軟庫又多基金揸，貨源歸邊，任大戶舞高弄低。的確係得意，街貨少是上市前已經知，兩星期前又唔見市場咁分析嘅，到中秋節大升後，才見有關報導相繼出籠。
青冰在眾安上市前曾在fb出post分析，話軟庫拎咗1/3貨，基金唔夠貨係好明顯的，利申上市首日再加了注，季結那天的確嚇到瀨呢，但只要止蝕設在上市價，輸極都係一成左右，唔需要太驚吖，平時買股中伏都係要10%至15%打靶，仲要怕到時冇人接貨，咁大隻新股，保母點都會在59.70頂嘛。
提番大家軟庫基金啲錢，其實不全來自孫正義，有大部分都係黎自中東油王，有逾十年股齡的你，可能會記得，當年有沙地王子，佢地的油王投資，就係喜歡趁國有銀行上市而入股，之後的事自己check吧，重點係，半桶水的青冰，不會認為自己比孫生及油王更了解更通透。
另外一個point比較少人提及，軟庫基金在上市後持有4.99%，剛剛是不需要申報的，這個相信是基金的意願，日後走貨就可以不動聲息，減少市場衝擊，但佢地有六個月禁售期，反之如果佢地加貨，第一棍一定狠狠的買，因為之後每一步都要申報了。
一隻咁火熱的股，保母行使超額認購權是理所當然，但上市5日都未見動靜，以前的經驗係，行使前都會挾升，之後會靜下來消化，戰友留意住相關消息吧，當日美圖(1357)喪炒，見頂之日就係從高位急回一成，亦要密切留意啊，不要問青冰目標價了，只能摸著石頭過河。
P.S.更加不要問百仕達(1168)喇，它持的是內資股，都唔沽得，計出來的眾安股份市值只是死數，再睇下早前炒上留下的蟹貨……
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com