內地黃金周消費狂歡
2017年10月09日
今年內地國慶遇上中秋放長假，搞到公路大塞車，觀察國慶假嘅過節情況，可見中國逐漸形成消費型社會，要留意呢種形態嘅社會，有咩股份會受惠。
國慶假期間內地只有樓市唔太掂，雖然九月十月係「金九銀十」嘅傳統樓市旺季，但阿爺提前出招，全國多地樓市調
控措施加碼，九月尾有十幾個城市推出新調控政策，搞到國慶假期多地樓市成交慘淡，部份一線城市同去年同期成交比較平均跌近八成，北京樓市更係二○○九年嚟最慘淡嘅黃金周。
內地樓市 國慶慘淡
據中原地產研究中心統計顯示，今年十月一日至六日黃金周前六天，北京新建一手住宅網簽量為78套，二手房網簽量為23套，都係2009年來嘅歷史最低值，一手房同二手房合計網簽量得101套，按年跌達72%。
另外中原數據顯示，黃金周前六日，多個熱點城市樓市成交出現明顯下滑，新房同二手房網簽資料平均按年跌咗八成。其中上海前六日新房網簽量為147套，比舊年嘅665套跌78%；南京前六日新房網簽量為312套，比舊年嘅844套跌63%。中原地產首席分析師張大偉預計，今年八日黃金周將對熱點城市10月賣樓數字有好大影響，估計熱點城市10月份成交資料都會創年內最低，甚至低過春節月份。
近日內房股熱炒，唔知呢個國慶假內地賣樓慘淡嘅消息，會唔會令內房股降降溫。國慶超長假房地產銷售降溫嘅同時，內地其他消費就異常火爆，開始顯露消費經濟嘅特質。據國家旅遊局預計，八日長假國內旅遊人數將達7.1億人次，按年增長10%；國內旅遊收入5900億元，增長12.2%，旅遊形態都體現出多樣化趨勢。
出境旅遊 增三成二
國家旅遊局調查顯示，黃金周期間選擇自己組織出遊嘅受訪者佔總受訪人數嘅54.3%，自然風景、名勝古跡、主題公園等係自由行遊客最感興趣嘅目的地。即係話跟團客漸減，自由行嘅數量已過半。
據人民網報道，今年假期國內出境遊增長32%。攜程旅遊網統計顯示，假日期間中國出境遊客數將超過600萬人次，出境自助遊成為主流。80後、90後群體開始晉升為旅遊市場嘅主力，利用長假去遊下世界，成為年輕人嘅新時尚。
本來話國慶假中國出境旅客大升32%，自然會聯想到濠賭股受惠，但上周五嘅情況就唔係咁，因為澳門旅遊局資料顯示，黃金周頭四日(即10月1日至4日)訪澳旅客只有46.86萬人次，較舊年少2%，其中來自中國嘅旅客約36.3萬人次，按年少5.1%。
遊客減少搞到濠賭股上周五下插，金沙中國(1928) 跌2.7%，收報39.6元；銀娛(027) 跌1.8%報55.4元，挫2.57%；澳博(880) 跌2.2%收報7.02元。
遊澳客升 濠賭可彈
後來三日赴澳旅客大幅回升，據澳門旅遊局公佈，黃金周首7天(10月1日至7日)訪澳旅客共有84.45萬人次，按年升11.6%。其中內地客有64.73萬人次，按年升9.6%。估計呢個新數字，有利濠賭股今日反彈回升。
講到內地國慶消費，國慶電影市場都異常火爆。據內地貓眼資料統計，今年國慶檔期平均內地每日票房收入超過3億元人仔，9月30日至10月7日呢八日國內影市總票房高達26.4億元，較舊年大升68%，創歷史新高，舊年國慶檔票房得15.7億元。
國慶檔最大嘅贏家當屬開心麻花第三部電影《羞羞嘅鐵拳》。截至上周六晚，該片累計票房達13.2億元，相當於國慶檔期其他影片票房嘅總和。成龍主演嘅《英倫對決》憑4.14億元嘅票房成為國慶檔期亞軍。王晶執導嘅《追龍》就以3.6億元嘅票房居季軍。
國慶票房 升六成八
今年上半年中國電影市場遇上樽頸，上半年票房只有250億人民幣，比舊年上半年票房收入只增長2%，係近幾年增速最低嘅一年。內地電影業人士分析，同上半年國產電影疲軟有關。國慶假中國電影市場發力，有利全年票房收益衝高。
如果國慶假令旅遊股、濠賭股、電影股受惠，內房股受壓嘅話，其實國慶高速公路塞車嘅現象，對汽車股長線不利。
上周五汽車股大升，例如吉利汽車(175) 上周五再升5.6%至27.35元。吉利由2016年2月嘅2.79元起步，喺兩年間大升咗近10倍！但係汽車增長係咪無限嘅呢？固然個別汽車公司可以打贏其他汽車公司，或者新能源汽車會取代傳統汽車，但整體市場嘅容量始終係一個問題。你睇下國慶期間，中國多條高速公路大塞車嘅狀況，就知係因為汽車增長太快，中國公路已經應付唔嚟，結果搞到喺國慶假開始嗰陣，原本兩個鐘頭嘅車程，變咗要十幾個鐘仲未到嘅慘況。面對呢個局面，內地嘅管理層一定要想方設法，防止同樣情況再次出現。
解決方向則不外乎三個，第一係增加公路建設，但中國公路已經起咗好多，再大幅增加建設應付可能一年得幾日嘅最高峰值使用率，似乎唔太現實；第二係調整長假期安排，其實內地過去已經逐步改革長假，將長假打散，未來可能要將節假變成年假，個人按需要放年假，以減低道路峰值嘅使用量；第三就係限制小汽車嘅出廠量，雖然第三個措施未必好快會發生，但隨住中國中產消費急劇膨脹，中國亦都要大力發展消費型經濟，汽車都唔可以任佢不斷猛增。
不過股市炒短期因素，唔理長遠問題，國慶假大塞車嘅消息，完全無損汽車股嘅升勢，可以估計，市場短期內都唔會對此有反應，直到真正有負面政策出現為止。
年底加息 無法避免
最後要講兩句美國利息走勢，上周五美國公佈九月新增非農業職位數據，比上個月減少3.3萬人，係七年以來首次負增長。而據路透社資料，市場原本預期九月職位增長會有九萬。新增職位減少嘅原因，應該因為颶風所造成。但睇返九月嘅失業率只有4.2%，創咗16年半以來嘅新低；時薪按年增長略低於3%，時薪增速高過預期，顯示美國就業情況非常良好。
高盛話，今年第三季美國時薪增速2.4%，高過上季度2.2%嘅增速，高盛相信美國12月會加息。而芝加哥商品交易所利率期權交易數據顯示，12月聯儲局加息嘅機率達90%，非農就業數據公佈之前，機率都仲係80%，可見薪資增長令到12月加息嘅機率大幅增強。
一講到加息，又唔可以唔提大家關心嘅本地樓市走勢。近呢一浪恒指升上高位，但地產股有啲跟唔上。例如新地(016) 上星期五收129.9元，較上次高位136.9元低咗5.4%。地產股經過一輪急升之後，如今正係唞緊氣，買樓狀況都有啲放緩跡象。但樓市係咪咁快會調整，都仲係一個問題。因為美國好大機會喺12月加息，美國連番加息或會觸發香港喺出年開始跟隨加息，不過喺開始嘅時候只會加0.25厘，對樓市冇太大即時影響。
陸羽仁
金融High Tea 舊文
來源 source: http://hdfin.stheadline.com