始終都係中字股好炒
2017年10月09日
港股上周一度衝破大時代高點，隨之觸發回吐壓力。美股三大指數周五就榮辱互見，杜指收市報22773點，跌1點，納斯達克指數收市報6590點，升4點，標普500指數收市報2549點，跌2點。
吉利升得勁過騰訊
港股9月份終止連升，唞一唞
後10月一開始就爆升，恒指升破28,000關口後，再挑戰2015年大時代高點28,566點，28626，為9年半新高，雖然見高位後升幅逐步收窄，收報28458，市成跨月連升4個交易日，累漲逾千點，有散戶在假後復市急漲時沽空，結果就被夾，成為升市下的輸家。「股王」騰訊(700) 上周曾見353.6元創新高，收報352元，周五單日貢獻恒指23點。但若論好炒始係汽車股，吉利(175) 破頂高見27.65元，收報27.35元，為周五表現最好的藍籌股，貢獻恒指25點。比亞迪(1211) 創近7年半高，收市升近2%報80.45元，其他唔少汽車股都創新高。
眾安唔講長揸只講短炒
大市升得急，主要係借住內地定向降準，市場憧憬今個星期內地放完國慶假期重放會造好，特別係北水會南下掃貨，所以見到升得勁嘅好多都係內地資金熱捧嘅概念，好似半新股眾安(6060) ，以及北水曾經大力炒過嘅美圖(1357) 。眾安曾高見96.1元，創上市新高，較招股價高出逾60%，收市報93.65元，如果配到一手100股，以收市價計，帳面賺3390元。由於貨源歸邊，加上街貨少，有好多人就睇佢會唔會咁快變紅底股。
眾安掛牌揀正好時間，結果唔夠一個星期就升咗50%以上，唔講長揸，短炒就已經夠和味。眾安股東有馬化騰、馬雲同馬明哲，加上軟銀做基礎股東，「卡士」強勁之餘，佢嘅主要股東好多都係揸住內資股，係香港自由流通嘅股份相對只佔公司股權不足10%，係頭三日大成交下，基本上所有自由流通股份都已經轉咗一次手。由於三馬名頭夠響，加上呢隻股係內地無得買，好多人上車炒炒，都係博呢個星期仲有北水南下炒佢，結果一谷就狂爆，呢啲係典型唔使講基本因素嘅資金炒作。
A股重開外，今個星期另一場好戲，就係特首林鄭月娥宣讀佢做特首嘅處女作。呢幾年《施政報告》對個市嘅影響好細，一來係因為股市多咗好多內資股，佢哋唔受本地政策影響；二來係政府有錢都唔肯使，所以對個市無乜刺激。呢次林鄭未腔，市場已經瘋傳各種派糖措施，包括會起首置單位平賣畀年輕人，減中小業嘅稅，仲有推動設計同科創等……。
《施政報告》刺激有限
有中環茶友話，回歸二十年以來，對經濟最大影響嘅《施政報告》，始終離唔開董建華嘅第一份。當年董伯伯提出要起「八萬五」，好多人都唔知係乜嘢意思，仲係樓繼續炒，但樓價結果就係呢個政策下見咗頂回落，最後仲跌到唔清唔楚，好多人破產收場。林鄭呢次上場，事前傳出會起首置屋，不過，發展商反應唔大，因為大家睇死政府無乜地，想起平樓賣畀市民，都無乜彈藥係手，加上佢似乎識做人過董伯伯，睇落唔似會同發展商死砌，所以有人甚至話，可以買定啲本地股票，博炒《施政報告》好消息。好似外資行美銀美林就出報告話稱，政府嘅政策轉向針對提高供應，料扭轉過去八年地產業的負面局面。該行予以主要持有香港農地的三大發展商新鴻基地產(016) 、恒基地產(012) 及新世界發展(017) 「買入」評級。
發展商想食住林鄭《施政報告》推出「首置上車盤」，為自己搞咗好耐都唔掂嘅發展開路，好似恒基南生圍大型發展，就放聲氣話最新方案本已預留土地興建居屋，若項目適合進行有關計劃，發展商願意與政府合作，並將興建的公營戶倍增，至提供達一千個「首置上車盤」。擺明係想官商合作，各取所需之餘，發展商搵銀、政府就有樓交差。只不過，世事唔知有無咁理想嘞。
對於炒《施政報告》嘅概念，陸羽仁認為，如果博個市繼續升要搵嘢炒(唔係投資)，咁本地股炒吓落後唔奇嘅，但若然要炒，當然都係炒番內地水鍾意嘅股票，皆因本地股市場太細，而且佢哋全部有數得計，有數計就炒得癲極都有限啦。
香港單車賽夠熱鬧 Adam郭落場晒料
呢兩日香港有兩個夠睇頭嘅體育活動，先係周六有曹星如對日本拳手嘅賽事，跟住就係香港單車節。兩個活動同時成為鬥拋諗頭嘅商業贊助嘅重頭戲。周六嘅「曹星如vs河野公平」，好多人都想睇但無飛，開賽前兩日，香港寬頻宣佈透過特設網站rex.hkbn.net免費獨家現場直播這場賽事。直播期間除有官方高清直播畫面，觀眾更可觀看360全景畫面，甚至配合VR設備，體驗置身現場的熾熱氣氛。主辦單位仲搵咗傳媒人伍家謙在網頁上進行多場直播。
睇完拳賽睇車賽
睇完拳賽，昨日就輪到香港單車節第三年舉行。為了表示對活動嘅支持，特首林鄭月娥雖然過兩日就要讀《施政報告》，都嚟現身支持。在賽事舉行前夕，有中環茶友係在馬會「大排檔」見到贊助活動的新地執行董事郭基煇(Adam)，新地除咗做贊助商，佢同其他高層仲會親自落場，還提醒茶友若想捧場，除了現場觀看，都可以看電視轉播。
近年，大企業都希望能贊助標誌性的運動項目。香港單車節第三年舉辦，大會已預計有近五千人參加，再創紀錄。ADAM講過，單車節目標是爭取未來能成為1.HC級賽事，佢仲提出待港珠澳大橋通車後以大橋路段為賽道。
新地近呢幾年，都好想搞個有代表性嘅運動，過去佢力谷跑樓梯，但坦白講，跑樓梯係個幽閉空間做運動，辛苦得嚟又無乜趣味，唔係咁啱一般人口味，加上係自己名下嘅商廈舉行，好難突圍，反而單車賽就大眾化啲。講開搞呢啲活動，新地作為最大地產商已經先拔頭籌，其他龍頭地產公司，對呢啲與眾同樂嘅社區參與活動，就仲有好多間未有乜表示喎。
陸羽仁
陸羽仁周記 - 陸羽仁 舊文
來源 source: http://hdfin.stheadline.com