魚樂無窮：為破頂做好準備
■西王特鋼早前發盈喜，不妨留意。 互聯網圖片
港股升穿三萬點後進入整固期，似乎要考驗大家對破頂嘅信念，雖然今年由頭升到尾咁滯，但實際上步速今個月才開始加快，派對唔似咁快結束，現階段係回氣再上定係見頂回落，大家心中有數。
破頂機會在眼前，但預期波幅會越來越大
，一來整體市場參與者明顯上升，左右市況力量更多；二來指數逼近高位，食糊盤亦會越見頻密。
你有信心股市再上嘅，要有心理準備手上強勢股會化身過山車，不停衝高殺落，當然，捱過呢段刺激時刻，便可享受無限嘅歡愉，讓盈利再滾大。
心血少頂唔順嗎？最簡單就係減磅套現，夜晚自然瞓得著，但記住往後唔好手痕買番，否則隨時低沽高買，得不償失。
個股方面，西王特鋼（1266）日前宣佈，今年起將恢復派息，預計派息比率達三成，即賺10蚊會向股東派3蚊。以中期每股盈利15.41分人民幣推算，現價股息率接近三厘。雖然唔算非常吸引，但引證兩件事情︰
第一，財務狀況健康，有能力作出分派。
第二，願意與股東分享盈利成果。
事實上，公司早前已發盈喜，預計首三季盈利將上升超過1.4倍，實際分派或會更多，不妨留意。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com