中環在線：
施永青交棒 叫阿仔接穩
本港龍頭地產代理中原地產老闆施永青噚日正式宣佈，交棒畀29歲阿仔施俊嶸（Alex，圖），施老闆將會逐步淡化自己嘅角色，甚至係應付傳媒提問，即係施老闆最耍家呢一環，佢都叫傳媒以後畀多啲機會Alex練習嚇。
施老闆早於兩年前介紹Alex畀傳媒認識，噚
日佢話，覺得「自己年紀有番咁上下」係時候交棒，「日後公司有乜決定，先搵Alex，降低我喺公司扮演嘅角色」。佢指，公司要進步，要新陳代謝，會畀Alex逐步接替佢嘅工作。至於施老闆成日講嘅樓市偉論，佢話：「傳媒嗰啲都可以搵佢，畀佢練習嚇。」
施俊嶸：成功有賴父親無為而治
掛住「主席助理」銜頭嘅Alex即場被幾名友好發展商高層挑機，仲被爆係首置客㖭。最刁鑽係英皇（163）執行董事張炳強，佢笑笑口問：「你老竇成日話無為而治，中原地產冇咗佢都OK，但佢無為而治，咁佢交啲乜畀你呢？你又會唔會繼承呢個方針？」
Alex就答：「非常尊重呢個文化，今日中原地產咁成功，因為有呢個文化。」對答淡定得體算過關喇。
施老闆囑咐：「要睇一場造化，交棒，掟出去容易，接唔接得住先難。」佢認為年輕人要多磨練，要有一定危險感，不確定性，咁先可以成長。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com