高位腳軟 閃跌V彈
2017年11月07日
港股呢個星期開市閃跌，一度挫逾400點，市場情緒一度幾緊張。不過隨著騰訊(700) 等科網股造好，個市定番落嚟，V彈到微跌6點收場，既反映人心有啲虛怯，但跌市你夠膽入場通常都得米。
保利協鑫升創兩年高位
昨日開市傳來多個利淡消息
，包括周小川警告內地金融風險上升；特朗普亞洲之旅反而令亞洲太平洋地緣政治風險再趨升；以及沙地打貪令中東資金要撤走等等。老實講當時覺得呢啲消息唔係咁致命，唔知點解個市咁大反應，要跌咁多，有一點無名腫毒的感覺。不過跌到上午十點三之後就企定，慢慢一步一步升返上來，所以話個市底仍然係比較強。
回顧番成日走勢，負面消息濕濕碎碎，但亦令恒指再一次下試上月低位，恒指曾失守10天線(28383) 及20天線(28435) ，但經過一輪V彈之後，恒指收報28596，跌6點；國企指數收報11524，跌77點，成交1117億元。
十大成交金額股份方面，騰訊(700) 創新高，一度高見379.6元，收市仍急升2.5%，報377元。閱文集團(722) 暗盤價續在高於70元之間叫價，曾高見80元，於76元錄得成交，較招股價55元，高出38%。緊接招股嘅網上汽車融資平台易鑫(2858) ，據接近承銷團隊消息稱，國際配售已接近滿額，預計今日將能滿額，並錄得超購。部份科技股跟隨騰訊同閱文嘅消息向好，網龍(777) 升4.9%收報26.9元；IGG(799) 收升4.5%報10.62元，中芯(981) 升勢未止，股價升2%報收14.14元。我一直話佢有轉勢跡象的保利協鑫能源(3800) 收升5%，報1.41元，創近兩年新高。
藍籌調整較多嘅係國泰航空(293) ，主要因為建滔化工(148) 同建滔積層板(1888) ，宣佈向卡塔爾航空分別出售4465.7萬股、約3.12億股及2189.9萬股國泰股份，合共約3.8億股，總代價約51.6億元。出售股份佔國泰航空已發行股本約9.61%，每股作價13.62元，較上周五收市價13.2元，有約3.18%溢價。建滔化工解釋，出售為投資變現的機會，完成後集團不再持有任何國泰航空股份，屆時預計會有約八億元收益，出售所得款項淨額作一般營運資金或實現其他投資機會。
建滔大手吸納國泰，一度引起市場憧憬有乜大動作，但後來國泰表明唔會請建滔代表入局，建滔主席張國榮亦表明持貨唔會超過10％，睇嚟大家都無乜火花，唔會有乜合作。
呢次建滔趁大行唱好沽貨，成功獲利八億離場，雖然有人話咁樣勞師動眾，不如簡簡單單買盈富基金賺得仲多，但呢啲只係事後孔明評論，建滔示範俾大家睇，國泰咁大隻股都有得炒，去年底趁佢績差股價跌就入貨，炒高搵到人接貨，唔夠一年執18%，成績相當唔錯。
國泰近年股價積弱，呢期趁油價上升，預期佢燃油對沖合約虧損減少，加上大行唱好，股價炒吓落後，由低位反彈，但佢嘅基本因素仲未見有明顯改善。國泰港龍合併結算，九月合共載客263.96萬人次，按年下跌1.2%，乘客運載率下跌2.3%至81%，以可用座位千米數計算運力則上升2.4%。首三季載客量上升0.1%，運力亦上升2%。
國泰無鑊氣要洩氣
建滔入股，市場最希望係有人買起國泰，好似張老闆出手，聯同中資入主，又或者成手貨俾中資，但國泰大股東太古控制權如鐵桶嚴密，加上佢哋似乎無意讓位俾中資話事，所以張老闆都無乜可以搞。呢次買家卡塔爾航空，本身大把水，加上俾其他阿拉伯國家圍堵打緊外交戰，掟啲錢搞吓突破都係小菜一碟。
陸羽仁
金融High Tea 舊文
來源 source: http://hdfin.stheadline.com