大棋局：石油股開始發力
■人民幣要對外拓殖，針對原油的各種佈局會係重要的一步。資料圖片
早前提及港股仍欠最後一升，有兩個板塊宜留意，一個係石油業，一個係電訊業。現維持上述睇法，而石油板塊近來開始發力。關於石油問題，從兩個角度睇。首先係油價，過去兩年觀察油價走勢（W
TI），估計由過百美元跌到24蚊已經見底，之後極大機會反彈一個開到50蚊左右，然後在30至50蚊之間徘徊。會徘徊幾耐唔知道，可能兩三年，要等突破。近期油價強勢，可能已準備突破，如此石油業相關股票會追落後。以上係技術走勢層面，此其一。
美國慢則2020年，快則2018年會成為原油出口國，要賣嘢，最理想當然係件貨賣到有咁貴得咁貴。美國出口原油及天然氣佈局，乃關乎美元萬劍歸宗之金融戰略，為嘅係鞏固及維持美元揸莊地位。就好似中國要搞人民幣國際化，呢種係一國之策，而非一人之策，並唔會因為任何人做美國總統而輕易改變。美國出口石油牽涉兩個層面，第一美國賣油你一定要用美元找數；第二沙特石油美元代理人角色淡化，石油美元迴路會逆行。兩樣嘢都會增加美元需求，美元主導地位就穩。上述為政治層面，此其二。
中國近年積極推動國內各類期貨，石油期貨算是重點。商品期貨其中一大作用是對沖，例如種植黃豆的農業機構想以當下市價賣黃豆，又怕遲啲價錢會跌，便可以在期貨作各種買賣鎖定價格。因此若中國石油期貨搞得起，中東各大產油國要賣油去中國，自然會成為中國期油的大客。咁樣嘅情況下，中東產油國賣油到中國，係咪仍繼續以美元結算就難講。因此美國出口原油、天然氣，中國力推國內石油期貨，以及拉攏中東各產油國入場，將成為美元及人民幣爭霸的戰場。人民幣要對外拓殖，除一帶一路外，針對原油的各種佈局會係重要的一步。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com