收市閒情：賀三萬點的第一爆
■賀三萬點第一爆──興奮到掟爛iPhone8！
「嘩！騰訊（700）黐咗線呀！」「嘩！港交所（388）追落後啦！」「嘩！恒指一定三萬點啦！」呢三個「嘩」，已經可以總結周二大家嘅心情。當然，大牛市下，追追趕趕忽高忽低，你總會做過唔少令你後悔莫及嘅錯事。
1
）排低兩格戇居居：「我諗住買隻388牛呀？」「你買咗未呀？」「排低兩格等緊」……結果，15分鐘後……「我隻嘢買唔到啦，一去冇回頭啦」。明明睇好隻嘢，點解仲要掛低兩格呢？係咪傻架？特別係大牛市，就不問價追啦。慳咗兩格追唔到，輸嘅唔止係你原本估中嘅升浪，仲有係自己有得睇冇得食嗰種夭心夭肺嘅痛。
2）當打股唔炒炒廢柴：「我輸錢呀！」「輸咩？」「上星期五買咗隻濰柴（2338），今日終於沽曬。」「過咗去就算啦，有冇平保（2318）呀！」「本來有，但為跟咗千頌C買隻廢柴，所以嗰日沽咗平保！」天啊！平保今日又破頂啦！故事教訓我哋，大牛市最緊要係唔好亂沽強勢股。平保氣勢如虹，又冇回落跡象，贏緊又唔等錢使揸住算啦。
3）畏高畏到去買Put：「大佬呀！隻企鵝430蚊，點買呀！」然後，轉個手，「我買咗公用股呀！」有冇搞錯，公用股另一個名叫「避險股」，即係依家太平盛世，出面跳緊草裙舞，你無啦啦走落去防空洞做咩呢？走去防空洞都算，最傻豬嘅，「個市咁旺，買隻熊仔先」，即係你唔理出面慶祝緊新年開Party，無啦啦走去諗「世界會末日啦，我跳海自殺啦。」結果隻熊就算冇當場死亡，都半身不遂。記住！就算睇淡，都不要造淡。
4）賀三萬點第一爆：以下內容，係真人真事，亦都係最傻豬，最值得大家留意！話說，今日有位重倉牛仔嘅人兄，收市後見夜期突然31,000點，然後，佢心情興奮；之後，佢亢奮得跳起來，然後，大力一揮，拎起手機，一掟！然後，爆了！而呢部手機，是價值7,288元，全新蘋果iPhone8智能手機。重中之重係，佢其實有部iPhone7，有7唔掟走去8，嗯，部機個數字係襯佢嘅（註：31,000點好可能錯盤交易）
最後，祝大家做個精明老散，三萬點見。
千頌C
htttp://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com