騰訊爆炒 賭局正酣
2017年11月22日
股王騰訊(700) 發飆，連同佢嘅衍生工具，成為大市焦點，帶動港股爆升557點，夜期更曾閃升1523點，曾見31341點，之後先再急跌番落嚟，如此異象甚有大時代重臨之感，是好是壞就見仁見智。
騰訊公佈業績後，大行合奏唱好，唱牛話睇目標價超過每股600元。股市從來係
炒前景，有大行睇得咁好，資金大量湧入。繼周一股價創新高後，周二未有回吐之餘，股價更進一步創新高，最高曾見439.6元，收升2.4%報430元，成交額217億元，單計騰訊貢獻恒指87點，市值輕易突破4萬億元，至4.08萬億元，市值已趕過社交媒體facebook的4.06萬億元，成為全球第五大市值企業，排名僅次於蘋果公司、Google母公司Alphabet、微軟及亞馬遜。
樂觀情緒充斥 窩輪熱爆
大家睇騰訊成交波瀾壯闊，唔好淨係睇佢普通股嘅交投，皆因佢嘅衍生工具一樣炒到癲，昨日有4隻騰訊嘅窩輪交投接近10億元，合計接近50億元，如果計埋其他騰訊窩輪，數字更加驚人，若然以交投最多嘅瑞信85認購輪，交投有14.2億元，實際槓桿率有6.5倍，等同係88億元嘅騰訊股份。佢嘅到期係出年5月份，行使價係486元，即係話如果去到呢個時間騰訊市價低過486元，持有人就剝光豬離場，依家炒家以19%溢價去買期貨，你可以話以騰訊一日升10元計，一啲都唔係貴，但換轉角度講，如果騰訊要半年再升5、60元，一年股價平均升幅要20%，等同市值再升10000億元，由此可見市場樂觀情緒。
騰訊衍生工具溢價趨升，主要係因為佢嘅波動大，意思即係炒呢啲衍生工具都幾貴，但點解都有人買呢？一來係可以刀仔鋸大樹，擴大賭注；二來係騰訊普通股升得咁急咁快，回起來都可以好犀利，買輪最多輸清離場，叫做鎖定風險。不過買輪其實先蝕溢價，隨著時間過去，時間值不斷令隻輪貶值，等於入賭場被人抽水，要快來快去，從呢個角度睇，騰訊衍生工具咁旺場，佢都間接變成股市中一個賭局。
騰訊今年長升長有，加上佢分拆嘅閱文(722) 咁成功，造成市場相信買騰訊無得輸，於是成個市場十個炒家有八個炒騰訊，呢種現象可以話相當罕見。點解會出現買騰訊無得輸嘅觀念呢？最開始係從基本因素推動，騰訊喺內地做科網真係好得，盈利年年上升，而且佢嘅產品好掂，瓣數多而勁，所以佢爆升係有原因嘅。
另一個好重要嘅市場因素，係過去北水無得買騰訊，但內地人好多都知道佢係好嘢，佢哋對騰訊嘅認識同熱愛遠超港人，所以當佢哋落嚟港股通，騰訊就成為香港特色嘅股市手信嘞，喺北水狂湧下，就造就咗呢個神話。
騰訊嘅神話依家已經形成咗，係人都知股市冇不滅神話，但幾時破滅無人知道，因為佢依家明顯進入資金驅動嘅狀態，升到邊要睇資金幾時枯竭，所以依家無論買騰訊抑或揸住騰訊，都唔好估頂，能夠做嘅係如果短炒記住轉身要快，若然係長揸，就訂個深啲嘅止賺位坐住個浪，試試睇吓可以衝到幾高。
平保挾科技概念開始癲
騰訊發威，中資金融股都同樣發力，齊齊推高恒指，結果恒指收報29818，創近10年新高，並且一舉逼近30000點關口，成為10月初以來最大單日升幅，國企指數收報11874，急升336點。大市交投暢旺，全日成交高達1570億元，創2015年港股大時代後新高。
內險股其實都幾癲，平保(2318) 首席財務執行官姚波自爆，科技業務進入收成期，日後來自科技的盈利將大於資本業務，刺激周二股價大升8.8%收造86.2元；其他內險股同樣向上，中國太平(966) 收升11%報32.2元，為表現最好藍籌股；中國太保(2601) 收升7.5%造41.4元；新華保險(1336) 則升5.2%報收56元。另外，友邦(1299) 、港交所(388) 和建行(939) 也是推高恒指的股份之一，3隻股份合共貢獻恒指212點，友邦收升4.3%造68.1元；港交所收漲5.5%造244.8元；建行上揚2.5%收造6.9元。
陸羽仁
金融High Tea 舊文
來源 source: http://hdfin.stheadline.com