濠賭股的天空
2017年12月20日
聖誕前冷鋒殺到，大添消費氣氛，尤其今年經濟暢旺，股樓俱壯，如此日子實在應該獎勵一下自己，正如前財政司司長梁錦松的金句，使咗嘅錢先係自己嘅錢。任何人財富有幾多，都係紙上富貴，唯有享受咗的消費，才肯定是自己係受惠者。
銀河破頂 澳博落後
醒目之人識賺錢亦識使錢，經濟好就反
映喺市道之上，所以聖誕未到，濠賭股已經報喜，個別股價已創新高，皆因澳門聖誕節假期訂房相當旺場，好似銀娛(027) 旗下有多個酒店品牌，當中澳門JW萬豪酒店早已爆滿，其中12月24、27日酒店房日前已爆滿，25日和26日的酒店房每晚未連稅索價約3560至4240澳門元；銀娛另一酒店品牌澳門麗思卡爾頓，則於31日酒店房已滿，聖誕日酒店房索價每晚逾15000澳門元，所以呢排佢股價再創年來新高。另一隻股價都唔錯嘅金沙中國(1928) 訂房都唔錯，個別房價聖誕節正日每晚差不多要2200澳門元。
陸羽仁早前同澳門博彩業猛人摸酒杯底，講起當地娛樂事業前景，佢係大好友，認為以美國拉斯維加斯為例，酒店房間遠超現時澳門之數，故此澳門酒店業應該有排玩。猛人自澳門回歸後，在澳門博彩業大展拳腳，財富幾何級數上升，能夠如此步大力雄，正是對前景信心爆棚，所以項目件件又大又精，食正呢個世紀大升浪。平心而論，澳門旅遊娛樂呢個大浪的確睇到人流口水，當地博彩數字固然一早已經超過美國賭城，而且賭城做博彩生意競爭大，做酒店係配套，基本上無乜錢賺，有時甚至要貼錢，但澳門因為市場急速成長，供應仲係緊張，所以連酒店都有錢賺，所以成盤生意真係啖啖肉。
睇番濠賭股，表現都係買得大、賠得大，投資最進取的銀河股價最勇進。過去幾年，澳門博彩業兜咗個圈，早喺2014年初，佢就高見過83.4元，當時大家睇佢會唔會變紅底股。隨著習近平上場大力打貪，澳門旅遊業大幅調整，佢股價喺2015年9月插過去21元邊，由峰頂唔見咗四分之三，到昨日彈番2倍，可謂歷盡高山低谷。同一樣的濠賭股，高低階段差唔多，但表現就唔同，好似澳博控股(880) ，喺2013年尾已經見頂，當時股價曾上過26元，去年中曾見過4.51元，跌幅超過八成，昨日從低位彈咗53%，彈力之分別，在於銀娛投入設施快夾多，澳博則仍等待大型項目投入，引擎未開動，令股價郁得唔快。 濠賭股昨日都算當炒，新濠國際發展(200) 升4.5%，報23.3元；澳博(880) 升2%，報6.89元；永利(1128) 升0.82%，報24.6元；銀娛(027) 升0.32%，報62.1元；但都有股份回調，金沙(1928) 跌咗0.5%，報40.05元；美高梅(2282) 亦跌0.84%，報23.55元。從唔同濠賭股比較，可以睇到雖然今年大圍環境係好咗，但仲未去番2014、15年高峰期，做博彩做到連酒店都有錢賺，呢種環境真係好到令人艷羨，但隨著供應增加，長遠就未必可以維持，所以濠賭股唔再係雞犬皆升，而係要揀股，而且佢哋升勢都會理性啲，唔會一支火箭咁升上去，正是同一樣的天空，不一樣的天氣。
平保顯強股本色彈逾4%
聖誕氣氛籠罩下，美股高收，恒指都造好，收報29253，升咗203點；國企指數收報11541，升126點，成交只有942億元。強股昨日發威，成交最多仍然係騰訊(700) ，股價重上400元，升1.8%，收報401.2元；平保(2318) 大彈逾4%，收報80.55元。假期在即，仲有公司爭取上市，中國針織機製造商中國福紡(8506) 今日開始招股，發售3億股，其中90%國際配售，餘下10%公開發售，集資最多8400萬元。每股招股價0.18元至0.28元，一手1.2萬股，入場費3393.86元。
陸羽仁
金融High Tea 舊文
來源 source: http://hdfin.stheadline.com