智取大市：大媽一個大弱點
■港股今次係炒大陸經濟增長預期，終點似乎未到，但過程隨時大上大落。資料圖片
2018年第一日，好友率先大勝而回，以首日升勢全面嘅程度，進賬多少只在乎有幾重倉。
港股升勢突然加速，係咪代表來得快又去得快？留意番，今次港股係炒大陸經濟增長預期，升級潮未必一支大陽燭
就足以完全反映，終點似乎未到，但過程隨時係大上大落，以大波幅chok住去終點，終點仲可能無聲無息咁出現。波幅增加嘅背後一大原因，係內地拆息高企，大媽呢一刻嘅弱點就係捱貴息，自然炒上去要快要狠，唔等得，食糊亦要快，先至合乎經濟效益。雖然港股順住原先預想劇本運行，但未來操作似乎並不輕鬆。
上期講到再生能源股，內地環保部早前為咗改善空氣質素，要求使用天然氣取代燃煤嘅「煤改氣」，導致華北天然氣供應嚴重不足，好多人因此要捱凍，即使城市管道燃氣准許回報上限，由6%調高至7%，但咁樣唔足以令天然氣可以彌補能源缺口。睇番數據，11月全社會用電量，按年增長4.6%，其中第三產業用電量更加增長8.5%，講到尾係受惠經濟增長升級潮，到頭來風電股金風（2208）、煤炭股兗煤（1171）同神華（1088）齊齊破位，呢轉升浪佢哋有幸成為領袖股，應該未玩完。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com